Топлото време може да биде честа причина за губење на апетитот, особено кај бебињата. Секој родител секако ќе се запраша дали е ова во ред и дали бебето добива доволно хранливи материи? Сепак, треба да се има на ум дека исхраната на детето ќе варира од ден на ден, па дури и од оброк до оброк. Понекогаш вашето малечко ќе јаде многу, а понекогаш може целосно да одбие оброци.
Обидете се да не се грижите премногу ако детето не јадело многу во еден оброк или на пример, во тој одреден ден. Понекогаш квалитетот е поважен од квантитетот.
Затоа, погрижете се кога детето нешто и ќе изеде, тоа да биде здрав и хранлив оброк со се што му треба. А еве неколку корисни совети како да се борите против жештините и недостатокот на апетит:
На бебето нека му биде удобно и пријатно
Топлото време може да го направи и најдоброто дете раздразливо и нервозно. Ако му е жешко и непријатно, сигурно нема да му биде до јадење. Затоа, првиот чекор е да го разладите. Раскомотете го детето и оставете го само во пелената, ќе видите, ќе ужива! Исто така, можете малку да ја разладите просторијата каде што бебето престојува и каде ќе јаде со помош на клима уред или вентилатор. Имајте на ум дека не треба да дува директно на детето и дека не треба да „претерувате“ со ладењето.
Течности
Многу е важно бебето да внесува доволно течности додека надвор се високи температурите, бидејќи неговиот мал организам многу полесно се прегрева отколку кај возрасните. Течноста ќе го спаси од дехидрација и топлотен удар.
Ако вашето бебе исклучиво го доите, понудете му ги градите почесто од вообичаено, ако е жедно, што веројатно е, ќе прифати и дополнителни подои. Со доењето на бебето нема да му треба вода дури ни на топло, но ако сакате можете да и понудите и малку превриена вода.
Ако бебето јаде адаптирано млеко и цврста храна, нудете му задолжително што почесто вода, зовриена и изладена. Избегнувајте да давате засладени чаеви и овошни сокови бидејќи содржат шеќер, не се здрави, а всушност нема да ја изгасат жедта – вашиот избор нека биде свежо овошје или каша од свежо овошје.
Што е можно повеќе движење
Точно, топлината е исцрпувачка, но активното бебе ќе си ја врати силата, а во исто време ќе му се отвори апетитот. Ако е премногу топло за излегување, прошетка или играње во паркот, кој обично го избирате во раните утрински или вечерни часови, можете да го одржувате вашето бебе активно и дома.
Мал базен или када полна со вода се одлични за играње, вежбање и разладување!
