Секој родител сака неговото дете да биде поштедено од тешкотии, да биде добар ученик и еден ден да се занимава со работа која ќе му носи задоволство и во исто време ќе му обезбеди добар живот. Иако не постои рецепт за воспитување успешни деца, психолозите укажуваат на некои фактори кои укажуваат на успех. Некои од навиките кои ги имаат родителите на успешните деца се следниве.
Ги вклучуваат децата во извршување на домашните работи
„Ако детето не мие садови, тогаш тоа значи дека некој друг го прави тоа наместо него“, тврди Џули Литкот-Хајмс, авторка на книгата „Како да се порасне возрасна личност“. Литкот-Хајмс истакнува дека децата кои не извршуваат домашни работи не можат да научат дека работата треба да се заврши и дека секој од нас треба да придонесе за на сите да ни биде подобро. Луѓето кои развиле работни навики во детството добро се снаоѓаат во нивните работни средини во подоцнежниот живот, тие стануваат сочувствителни бидејќи од сопственото искуство разбираат што значи труд.
Ги учат децата на социјални вештини
Истражувачите од Државниот универзитет Пенсилванија следеле повеќе од 700 деца од раѓање до 25. година во различни делови на САД и откриле значајна врска помеѓу нивните социјални вештини во градинка и успехот во зрелоста. Се покажало дека социјално компетентните деца кои се дружеле со своите врсници им помагале на другите, знаеле да сочувствуваат со туѓите чувства и се способни самостојно да ги решаваат проблемите. Воедно, многу почесто завршувале факултет и стекнувале постојана работа пред да наполнат 25 години отколку децата со ограничени социјални способности. „Ова истражување докажува дека најдоброто нешто што можеме да го направиме за да ги подготвиме децата за здрава иднина е да им помогнеме да развијат социјални и емоционални вештини“, вели Кристин Шуберт.
Веруваат во успехот на нивните деца
Анализирајќи го националното истражување во кое учествувале 6.600 деца, професорот од Универзитетот Калифорнија во Лос Анџелес, Нил Халфон и неговиот тим утврдиле дека врз достигнувањата на децата многу влијае довербата на родителите. „Родителите кои го виделе своето дете на факултет успеале да го насочат кон таа цел, без оглед на приходите и другите ресурси“, тврди Халфон.
Добро се согласуваат
Децата чии родители често се караат, без разлика дали се во брак или разведени, обично полошо поминуваат од децата чии родители се согласуваат, открила анализата на студијата спроведена на Универзитетот Илиноис. Некои студии покажале дека децата кои пораснале во неконфликтна средина со само еден родител се поуспешни од децата кои пораснале во конфликтни семејства со двајцата родители. Родителските расправии кои му претходат на разводот, исто така, имаат негативно влијание врз децата, а конфликтите по разводот имаат силно влијание врз приспособувањето на децата. „Кога децата се сведоци на конфликт и гледаат дека нивните родители го решиле, тие стануваат посреќни отколку пред да го видат“, вели Е. Марк Камингс, развојен психолог од Универзитетот Нотр Дам. Таквите конфликти ги уверуваат дека нивните родители можат да ги решат работите. Исто така, децата забележуваат кога едниот родител се повлекува за да избегне расправија или прекин на комуникацијата, а нивната емоционална реакција на тоа не е позитивна.
Ги учат математика уште од мали нозе
Мета-анализата на 35.000 деца од предучилишна возраст од САД, Канада и Англија открила дека развивањето математички вештини од најмладите денови може да значи огромна предност не само во математиката, туку и во читањето.
