Пубертетот кај девојчињата обично почнува околу 10. година. Тоа е време во кое телото созрева и постапно станува тело за возрасна жена. Телото на девојчето полека се менува и расте, станува заоблено во подрачјето на колковите и стомакот, градите растат, оти се зголемуваат млечните жлезди, растат влакненца под пазувите и на интимната регија, а доаѓа и до психичко созревање.
Во текот на тие години девојчињата добиваат прв циклус (менструација), некои на девет, а некои дури на 14 години, па и подоцна.
Важно е со девојчињата да се разговара за промените кои ќе се случат и тоа пред да се случат, со цел детето да не се уплаши при добивањето на првиот циклус. Важно е да се разговара искрено и отворено за се што ќе се случува. Вашата ќерка мора да знае зошто добива циклус, колку трае, како изгледа, како исправно да ја одржува хигиената за време на циклусот и секако дека тоа е природна појава која покажуват дека таа е здрава жена.
Месечниот циклус, вообичаено, во прво време е нредовен, а стабилен станува околу 20 година, а понекогаш и по породувањето. Важно е да се упати девојчето дека добивањето менструација значи дека се случува овулација, односно дека тие денови обично во средина на циклусот, кога жената е плодна и може тогаш да остане бремена, во случај на незаштитен сексуален однос.
