Според препораките на Светската здравствена организација, доењето на бебето со мајчино млеко е исклучително важно за растот и развојот на детето и се советува во првата година од животот на детето.
По шестиот месец постепено, по шема се воведуваат останати намирници, а должината на продолжување на доењето е одлука на мајката. Доколку мајката од одредена причина не е во можност да го дои бебето, или е неопходна дополна, постојат и различни млечни формули согласно возраста на детето. Кравјото млеко никако не треба да се воведува до првиот роденден на детето, иако денес мајките оваа граница ја поместуваат се нагоре, до вториот роденден.
ДАЛИ КРАВЈОТО МЛЕКО ИМ Е НЕОПХОДНО НА ДЕЦАТА?
Само неколку децении наназад, некој не би го поставил ова прашање, токму поради општо прифатениот факт дека млекото е здраво и неопходно за раст и развој на детето. Овој факт се поткрепува со сознанието дека млекото е богато со калциум кој е неопходен за раст на коските, и содржи витамин Д кој има значајна улога во многу процеси на организмот, вклучително и јакнење на имуниот систем. Богато е со протеини и важни нутиренти, па затоа и е омилена намирница години наназад. Денес, за жал, се повеќе студии покажуваат дека денешното млеко ниту одблизу не е со истиот квалитет како во минатото. Педијатрите и нутриционистите во светот, се повеќе советуваат дека витамини, минерали и протеини на децата им се обезбедуваат и преки други намирници, а млекото останува во употреба како стара добра навика.
Се повеќе се слушаат и препораки дека млекото до 12. година е оправдано, а дека потоа, млечните производи треба да го превземат приматот. Не треба да се занемарат и студиите кои советуваат децата кои имаат различни форми на алергија, астма, атописки дерматитис, треба да коснумираат млеко што помалку, што во повеќето случаи не се однесува и на сите млечни производи.
ШТО Е ВАЖНО ДА ЗНАЕТЕ АКО СЕ ОДЛУЧИТЕ ЗА КРАВЈО МЛЕКО?
Никогаш не воведувајте животинско млеко во исхраната на децата пред првиот роденден, а се повеќе препораки се тоа да не се прави до 15. месец. Се воведува постепено и се следи реакцијата кај детето. Алергијата на млеко се забележува кај околу 3% од популацијата, а најчесто се манифестира до третата година. Може да предизвика бројни дигестивни тегоби, но и појава на осип и гушење.
Интолеранцијата на лактоза, забележана е кај значаен процент на целокупната популација, дури 75% од луѓето имаат интолеранција на лактоза, односно имаат недостаток на ензимот лактаза кој треба да ги разложи млечните шеќери и така да помогне при метаболизмот на млекото.
КОИ СЕ ДРУГИ АЛТЕРНАТИВИ ЗА КРАВЈОТО МЛЕКО?
Во налет на следење на се повеќе трендови, мајките посегнуваат и по различни алтернативи. Најчесто се интересираат за козјото млеко, за кое постои верување дека е нутритивно побогато, но и дека помага при јакнење на имунитетот. Факт е дека содржи поголем број средносинџирести масни киселини кои добро се ресорбираат, па често и подобро се толерира, но тоа е доста сиромашно со фолна киселина, и не би требало да биде основно млеко кое детето го консумира, за да со тек на времето не се развие мегалобластна анемија.
Овчото млеко има исклучително висок процент на протеини, дури шест пати повеќе од мајчиното млеко, како и калциум и други минерали. Поради својот специфичен мирис и вкус, многу често децата и не го сакаат во најраната возраст, а секако со него и треба да се почека до втората година.
Козјото и овчото млеко секако не се замена за обичното млеко, може да му се дадат на детето по втората година, но не секојдневно. Но, во постара возраст, кај детето може да се воведе козји или овчи јогурт или сирење, кои имаат поголем бенефит на здравјето од самото млеко.
За децата кои имаат некаков вид на алергија или интолеранција на животнско млеко, постојат и растителни алтернативи.
Во следното продолжение: Колку млеко е доволно и значењето на млечните производи во исхраната на детето
