Ларингитисот е воспаление на ларингсот (гркланот, гласните жици) и се манифестира со нагла зарипнатост по воспаление и отеченост на слузницата на грлото. Истовремено, може да се јави и ларингеална кашлица (која наликува на лаење на куче), отежнато вдишување воздух и пискав звук при вдишувањето воздух (т.н. ларингеален стридор). Најчесто се јавува во лесна форма која поминува за една недела.
Кај децата најчест е акутниот катарален ларингитис кој е предизвикан од групата на респираторни вируси. Почнува постепено со знаци на воспаление на носот и гркланот (затнато носе, носна секреција, болно и чувствително грло, поткашлување). Општата состојба е лесно нарушена, но по неколку дена може да се надоврзат симптоми од страна на гркланот.
Во детската возраст честа е појавата и на спастички субглотичен ларингитис кој настанува поради спазам или стегање на мускулатурата околу гркланот.
Се јавува одеднаш, обично ноќе, кога детето кое легнало здраво, по неколку часа спиење станува вознемирено, со отежнато дишење, зарипнатост и ларингеална кашлица. По смирување на нападот во следните неколку дена, присутна е зарипнатост и ларингеална кашлица. За појавата на овој облик на ларингитис одговорни се, покрај респираторните вируси, и конституционалните фактори. Поради тоа кај некои деца оваа состојба може да се повторува неколкупати. Почесто се јавува кај машки деца на возраст од 6 месеци до 4 години.
