Проф. д-р Саи Реди, имунолог од Швајцарскиот федерален институт ЕТХ Цирих предупредува дека „Ковид-22“ може да биде многу поопасен од постоечкиот. Швајцарскиот имунолог вели дека комбинацијата на постоечките соеви би можела да резултира со нови, поопасни мутации и поопасна фаза на пандемијата.
„Ковид-22 би можел да биде многу поопасен од она на што сме сведоци сега“, предупредува Реди, а пренесува британски „Мирор“.
Затоа, вели тој, ќе биде неопходно да се направат повеќе вакцинации во следните години, „можеби и до крајот на нашите животи“. Зборувајќи за швајцарскиот весник „Блик“, научникот вели дека поради соеви како што е делта, „ова повеќе не е Ковид-19“ и предупреди дека секој што ќе одбие да се вакцинира, ќе биде заразен во одреден момент.
„Количината на патогени која ја носи делта варијантата со себе е толку голема што секој што не е вакциниран може да биде суперпреносител“, нагласува Реди.
Тој додава дека бројот на заболени ќе се зголеми наесен и предвидува враќање на рестриктивните мерки во некои земји.
„Многу е веројатно дека ќе се појави сој против кој нема да можеме да се потпреме само на вакцинација. Затоа, ние мора да се подготвиме за неколку вакцинации во следните години, а вакцините ќе мора да се прилагодат на новите мутации“, вели Реди.
Проф. д-р Саи Реди вели дека поради соеви како што е делта „ова повеќе не е Ковид-19“ и предупредува дека секој што ќе одбие да се вакцинира, ќе биде заразен во одреден момент
Научникот изјави дека бета сојот од Јужна Африка и гама сојот од Бразил делумно можат да ги избегнат антителата, додека „делта е многу позаразна, но не развила механизми за избегнување на антитела“. Реди се плаши дека следниот чекор ќе биде комбинација од двата соја: бета и гама.
„Тоа е неизбежно. Тоа е следната фаза на пандемијата кога бета или гама ќе станат се позаразни или делта ќе развие мутација на имунолошко бегство, т.е. ќе стане поотпорна на вакцината. Тоа ќе биде голем проблем следната година. „Ковид-22“ може да биде полош од она на што сме сведоци сега“, вели тој.
„Ако се појави таква варијанта, треба да ја препознаеме што е можно поскоро, а производителите на вакцини треба брзо да ја прилагодат вакцината. Појавата на оваа нова варијанта е голем ризик. Треба да се подготвиме за тоа“, вели тој.
Проф. Реди смета дека не чека иста есен и зима како и минатата година, исклучиво поради ниската стапка на вакцинација.
„Вирусот и нашиот имунолошки систем сега се тесно поврзани – како двајца танчери: имунолошкиот систем се движи и вирусот реагира. Ќе танцуваме уште долго со вирусот. Веројатно со години, можеби и до крајот на нашите животи“.
