Доколку во одредени моменти почувствувате неверојатна потреба да ги раздвижите нозете за да се ослободите од вкочанетост, трнење или пецкање, тогаш веројатно страдате од синдром на немирни нозе кој може многу да влијае на сонот.
Истражувањата покажале дека дури 16% од трудниците страдаат од овој синдром.
Синдромот лесно се препознава, бидејќи се јавува обично кога одморате, или пред спиење, или ако сте седеле подолг временски период, на пример во кино или за време на подолго патување. Синдромот на немирни нозе, жените обично го чувствуваат во нозете, но може да се појави и на стопалата, шаките и рацете.
Едноставно поместување на екстремитетите носи моментално олеснување, но чувството на немир се враќа штом ќе се смирите. Непотребно е да каже колку тоа може да биде непријатно и иритирачко особено кога ќе сакате да заспиете. Ако синдромот на немирни нозе не ви дозволува да заспиете, тоа може да доведе до хроничен замор и неможност нормално да се функционира следниот ден.
За среќа, жените кои ќе го искусат овој синдром за време на бременоста треба да знаат дека состојбата е моментална и дека по породувањето се ќе се врати на старо. Симптомите најчесто се појавуваат во 7. и 8. месец од бременоста и со раѓање на бебето едноставно исчезнувуаат сами од себе.
ПРИЧИНИ
Научниците до сега не откриле ниту една можна причина која води до оваа состојба, иако изминатите години се спроведени разни истражувања. Покрај тоа што најчесто ги погодува трудниците, овој синдром може да се појави и кај мажите, децата и жените кои не се бремени. Исто така, никој не знае зошто овој синдром се појавува кај жените во бременост, иако порано никогаш не го почувствувале. Од друга страна, постојат бројни теории кои велат дека синдромот се појавува поради недостаток на железо и фолати во организмот, како и по хормонално пореметување, односно зголемено ниво на естроген.
