Вообичаено е убодот од комарец да предизвика блага кожна реакција. Може да се влоши во текот на следните 24 часа, но обично исчезнува после тоа, често во рок од една недела. Меѓутоа, поретко детето може да има потешка реакција наречена Скитеров синдром.
Почесто се јавува кај мали деца и бебиња. Ќе забележите голем оток, црвенило и чешање или детето ќе се жали на болка на местото на каснувањето. Таквата реакција може да се развие во рок од неколку часа по каснувањето и да трае со недели.
Мало црвенило и оток се појавуваат во рок од неколку минути по каснувањето, проследено со црвено-кафеава испакнатина во следните два дена. Јазолот е обично тврд и чеша. Понекогаш детето може да добие мали пликови или мали темни дамки кои изгледаат како повреда. Контактот со комарец мора да трае најмалку шест секунди за да дојде до овој тип на реакција, пренесува Webmd.
Кој може да добие Скитер синдром
Скитеровиот синдром е предизвикан од реакцијата на телото на полипептидите кои се наоѓаат во плунката на женските комарци. Полипептидите се синџири на молекули наречени амино киселини. Женскиот комарец мора да се храни со крв за да произведе јајца. Комарците користат делови од устата наречени пробосциси за да ја пробијат кожата и да цицаат крв. Додека цицаат крв, во организмот внесуваат и мала количина плунка, бидејќи плунката содржи супстанца која го спречува згрутчувањето на крвта. Машките комарци не касаат.
Скитеровиот синдром е редок, но некои чувствителни групи имаат поголема веројатност да го добијат, а тоа се:
- Бебињата и децата, бидејќи имаат послаб имунитет.
- Возрасни кои се каснати од вид на комарец со кој претходно не доаѓале во контакт. Полипептидите во плунката може да се разликуваат од еден вид до друг вид. Може да имате Скитер синдром од каснување од еден вид, но да немате реакција на каснување од друг вид.
- Посклони се луѓето кои имаат нарушување на имунолошкиот систем. Тоа е системот кој го штити вашето тело од инфекции.
Ако детето има неколку каснувања од комарец, тоа станува помалку чувствително на плунка, така што тешките реакции како Скитеров синдром не се чести.
