Раѓањето на детето е навистина најубавиот настан во животот, но и најголемата животна промена. Првите месеци со бебе, иако убави, не се нималку лесни, а често се случува новопечените мајки да се соочат со постпородилна депресија.
Постпородилната депресија е сериозна психолошка состојба која може да има негативно влијание врз емоционалното и физичкото здравје на жената, предупредува психологот д-р Валерија Мошњачкај, наведувајќи неколку помалку очигледни знаци кои укажуваат на оваа состојба.
Еден од „скриените“ знаци на постпородилна депресија може да бидат промените во апетитот, вели таа и објаснува дека некои жени имаат намален апетит по породувањето, а некои имаат постојана желба нешто да јадат. Ова може да доведе до губење на тежината или зголемување на телесната тежина, што е главно поврзано со хормоналните промени, но може да биде поврзано и со психолошката состојба.
И проблемите со спиењето може да укажуваат и на постпородилна депресија. Потешкотиите да заспиете, како и раните будења и неуспешните обиди за повторно заспивање, не се сигнали што треба да се игнорираат, вели психологот.
Постојаниот замор и недостатокот на енергија исто така може да укажуваат на постпородилна депресија. Во овој случај и по одмор, новопечената мајка се чувствува уморно и исцрпено, објаснува д-р Мошњачкај.
Покрај сето тоа, таа како потенцијални знаци ги наведува и раздразливоста и честите промени во расположението, како и проблемите со концентрацијата.
„Желбата да се избегне комуникација со пријателите или семејството или чувството на социјална изолација, исто така, може да укаже на постпородилна депресија. Губење интерес за лична хигиена и грижа за себе се некои од другите знаци. Жената може да има потешкотии да најде сила за секојдневно извршување на обврските. Во посериозни случаи може да се појават мисли за повредување на самите себе или на детето. Ова е сериозен симптом кој бара итна помош“, заклучува психологот.
