Најновото истражување за физичката подготвеност спроведено кај повеќе од 20 илјади ученици во основните училишта во Словенија, укажало на огромен пад на моторичките способности и значајно зголемување на дебелината кај децата за време на епидемијата со КОВИД-19.
Анализата на лабораторијата за дијагностика на телесниот развој на Факултетот за спорт во Љубљана, во која резултатите од физичката подготвеност на децата од јуни оваа година биле споредени со последните направени во април 2019 година, покажала дека во тој период е забележан пад на моторичката ефикасност кај две третини од децата и дека таа во просек е намалена за 13 проценти.
Уделот на деца со прекумерна телесна тежина во тој период се зголемил за дури 20 процнети, што претставува највисока бројка откако се следат податоците за дебелината меѓу младите. Зголемување на поткожно масно ткиво е евидентирано кај повеќе од половина од основците, покажала анализата.
“Таквото зголемување на бројот на деца со преголема телесна тежина за една година е нешто непоимливо кое досега, откако ги спроведуваме испитувањата, не се случило“, вели Грегор Старц од Факултетот за спорт кој со години наназад ја испитува и следи физичката кондиција и моторичките способности кај децата и младите.
Тоа, како што укажуваат авторите на студијата е директна последица на рестриктивните мерки во училиштата во првиот бран на епидемијата оваа пролет, кога училиштата беа затворени, наставата се одвиваше на далечина, а беше забрането и вежбање на игралиштата, напуштање на местата на живеење, како и дружење на јавни простори.
“Ако сега и во вториот бран ни се повтори истото сценарио, тогаш можеме, за жал, да зборуваме за една “коронагенерација“ на млади кои ќе имаат големи здравствени потешкотии, ќе бидат помалку успешни во учењето и цел живот ќе го носат товарот на рестриктивните мерки кои им ги наметнале повозрасните, вели Старц.
