На младите родители често не им текнува дека и на бебињата треба да им се мијат рацете. Тие многу често ги ставаат рачињата во уста и ги воденат со плунка, а влажната подлога е погодна за развој на бактерии. Поради тоа, пожелно е неколку пати во денот дланките на бебето да се мијат со млака вода и бебешки сапун. Притоа е важно нежно да се рашират бебешките прстиња, за да се измијат деловите меѓу прстите, каде може да се насобере нечистотија.
На бебињата брзо им растат и ноктите и мора да се сечат некогаш и до два пати во неделата. Под долгите нокти се собира нечистотија, а детето може да се изгребе, најчесто по лицето.
Потребни ви се ножички, кои се мали, оштри со тапи врвови и кои ќе ги користите единствено за сечење на ноктите кај бебето. Најдобро е детето да лежи на масата за повивање, или во скут кај мајката. Земете ја раката на бебето во својата рака, така што со прстите ќе ја фиксирате неговата дланка, а со палецот горниот дел од шаката. Внимателно, да не ја повредите и кожата, полукружно отсечете го секој нокт. По тоа, измијте ги рацете на детето со топла вода и бебешки сапун.
