Родителите имаат одговорност да обезбедат безбедност, храна, облека и љубов за своите деца. Иако е важно да се задоволат нивните емоционални и социјални потреби, не постојат строги правила како да се постигне тоа. Родителските совети често се субјективни – она што функционира во едно семејство може да предизвика хаос во друго.
Некои родителски пристапи се доживуваат за премногу строги или застарени, но истражувањата покажуваат дека некои од овие правила всушност им помагаат на децата да станат поодговорни, понезависни и поуспешни.
- Нема екран на маса
Во време кога децата постојано се на телефон, правилото „нема екрани на маса“ можеби изгледа претерано, но има бројни придобивки. Според советничката Лиза Њуман, заедничките оброци им помагаат на децата да развијат долгорочни здрави навики во исхраната. Но, семејните оброци не се само за храна – тие обезбедуваат структура, време за релаксација и можност за поврзување по напорниот ден.
Забранувањето на мобилни телефони и таблети за време на оброците му овозможува на семејството да се фокусира на разговорот и ги зајакнува семејните односи. Иако децата може да се побунат против ова правило, на долг рок ќе ја разберат неговата вредност.
- Задолжителни домашни работи
Многу луѓе ги исмеваат родителите кои инсистираат на строг распоред за домашните обврски, но истражувањата покажуваат дека таквиот пристап има долгорочни придобивки. Едно 75-годишно истражување на Харвард за факторите кои предвидуваат здравје и благосостојба во зрелоста, покажа дека децата кои имале обврски дома уште од мали нозе пораснале во независни и одговорни возрасни луѓе.
Давањето одговорност на децата за домашните работи ги учи на одговорност за нивниот простор. Дури и едноставните активности, како што се ставање играчки на место или сложување чиста облека, им помагаат да развијат чувство за цел и гордост.
- Заштеда на џепарлак
Правилото дека децата мора да го штедат својот џепарлак на многумина им изгледа премногу строго, но им помага подобро да го разберат управувањето со парите. Финансиската писменост не е вродена вештина – таа се учи, првенствено дома.
Генерацијата Х и милениумците пораснаа со џепарлак што го заработуваа правејќи домашни работи, а ги трошеа на ситници како гуми за џвакање или сладолед. Меѓутоа, денес, џепарлакот е значително поголем – според истражувањето на Американскиот институт за овластени јавни сметководители, просечниот џепарлак во 2024 година е речиси 30 долари (приближно 30 евра) неделно. Иако 75 отсто од родителите тврдат дека целта им е да ги научат децата да штедат, само три отсто всушност бараат нивните деца да одвојат пари за подоцна.
Иако на децата можеби не им се допаѓа ова правило, со текот на времето тоа ќе им помогне да развијат поодговорен однос кон парите.
