Работната група за превентивни услуги на САД објави нови препораки во кои се нагласува потребата од ран скрининг на децата за анксиозност и депресија.
Меѓу децата на возраст од над осум години би требало да се спроведе скрининг за анксиозност, а меѓу оние на возраст од над 12 години треба да се направи скрининг за депресија, стои во препораките.
“За да одговори на потребата за поддршка на менталното здравје на децата и адолесцентите во примарната здравствена заштита, Работната група ги проучуваше податоците за скрининг на анксиозност, депресија и ризик од самоубиство“, изјави членката на групата Марта Кубик од Универзитетот Џорџ Мејсон.
Следењето на овие проблеми кај децата може да ги намали симптомите на депресија, но и да влијае на подобрување, па и излекување на состојбата на анксиозност, се вели во соопштението на Работната група.
И иако недијагностицирани случаи кои се однесуваат на менталното здравје кај децата постоеле и пред пандемијата со КОВИД-19, лекарите и психолозите предупредуваат дека влијанието на оваа голема здравствена криза врз некои деца може да биде крајно трауматично.
Американските експерти се на мислење дека онлајн школувањето, повторените карантини, мерките за физичко растојание, носењето маски и останатите промени во вообичаениот начин на живот би можеле значајно да влијаат на менталното здравје на децата.
Експертите од групата сметаат дека е потребно да се направат и дополнителни истражувања за овие сериозни проблеми меѓу децата и тинејџерите. Тие советуваат да “во меѓувреме здравствените работници го користат сопствено клиничко расудување врз основа на индивидуалните околности за одделни пациенти кога одлучуваат дали да вклучат дете или тинејџер во скринингот или не“.
Во исто време, спроведена е студија во Британија која покажала многу поголема веројатност дека кај децата од основните училишта со долг КОВИД-19 ќе се развијат ментални нарушувања во однос на децата кои не искусиле такви последици од болеста.
Британската Агенција за национална статистика утврди дека постои 30 отсто поголема веројатност од развој на барем едно ментално нарушување меѓу учениците на возраст од пет до седум години по долг КОВИД-19.
