Враќањето на децата во градинките во нашата земја се уште е неизвесно, а според најавите на министерството за здравство се прават анализи и теркови кои ќе обезбедат безбедно враќање на најмладите во институциите за згрижување. Засега е непознато како ќе тече овој процес, кога и дали воопшто ќе започне и кои деца ќе можат да се вратат во градинка.
Некои европски земји ги отворија градинките, но со строго контролирани правила и услови, а за таков чекор од идната недела се подготвува и соседна Србија.
Професот д-р Георгиос Константинидис, претседател на Здружението на педијатри на Србија, пред поаѓањето на децата во градинка, вели дека само 4 проценти од децата имаат коронавирус без симптоми, што укажува на тоа дека се мали шансите дете да го внесе вирусот во овој колектив. Според него, шансите се уште помали ако се земе предвид и тоа дека предуслов за враќање на детето во градинка, е тоа да биде комплетно здраво. Но, тој не ја исклучува можноста да со почетокот на работата на градинките, да се појави некој опаш на епидемија.
“Во респираторните епидемиски процеси се трае од шест до осум недели, а ако оди експлозивно оди шест недели. Меѓутоа, може да има и продолжеток на епидемијата и да оди од 12 или 13 недели. А опаш – тоа е всушност кога епидемијата ќе се угасне, а потоа ни останува чувствителноста на старите лица и децата, а вирусот се врати назад. Кога тоа ќе се случи, никој не знае“, објаснува проф. Константиниди.
Еве што тој објаснува за тоа кои се сите предуслови да детето тргне во градинка, но и зошто децата не треба да носат маски при престојот во нив.
“Прв предуслов е сите деца комплетно здрави да влезат во градинка и релативно е мала шансата да дојде некое кое е заразено. Втор услов е да мораат да бидат мали групи, никако поголеми од седум деца, значи помеѓу 5-7 деца. Тоа се се искуства од оние кои не ги затворија градинките, како што е Шведска, и на оние кои повторно ги отворија како Германија, Норвешка…“, вели проф. Константинидис и објаснува зошто малите деца не треба да носат маски:
“На возраст од 3 до 5 години не е можно да се носи маска. Таа соработка е можна со деца дури после шестата година. Тие не треба да носат маски, бидејќи во својата игра и начин на живот, не е за очекување дека ќе се придржуваат на правилата за носење маска, туку ќе ја вадат, ставаат, спуштаат и потоа таа маска, доколку некаде на површината има вирус, всушност ќе биде само извор на зараза. Значи децата во градинка не треба да носат маски, но воспитачките треба. Исто така, на децата, на влез треба да им се мери телесна температура, и да се провери дали кашла во текот на престојот“.
Тој потсетува дека просториите мора да бидат целосно дезинфицирани, и почисти од вообичаено. При тоа истакнува дека децата ќе бидат во одреден ризик од зараза и дома, особено што родителите одат на работа и имаат и други контакти.
“Само 4% од децата имаат коронавирус без симптоми, иако се верували дека се повеќе и тое е она што е добро. Околу 56%, според сите анкети имаат блага клиничка слика, повеќе од една третина имаат средна, а многу мал број тешка клиничка слика. Според последните податоци од крајот на април, во Европа меѓу децата до 10 години нема смртен исход. Така што, со оглед дека само целосно здрави деца може да почнат во градинка, мали се шансите тие со себе да донесат вирус“, објаснува професорот.
Тој додава дека тегобите и кај децата се изразуваат во вид на малаксалост, зголемена телесна температура, кашлица, евентуално затнување на носот. Вели дека кај децата може да се појави и пролив, кој не е посебно изразен, додека воспаление на белите дробови се јавува значајно поретко.
При тоа, наведува дека се појавила и една релативно тешка форма на заразата која се јавува еднаш на 5.000 до 10.000 слуачи, и се работи за системска инфламаторна болест или Кавасаки синдром.
“Прво е опишан во Англија, а потоа го опишаа и во Шпанија и Италија. Таа форма е многу ретка, но постои можност да се јави. Меѓутоа, никој од него досега не починал. И треба да се биде многу внимателен со давањето на таа дијагноза, која секако е поврзана со КОВИД-19, но Кавасаки се јавува и по други вирусни и бактериски инфекции“, објаснува проф. д-р Константинидис.
