Лошите навики се однесуваат на повторено или вообичаено негативно однесување кое е социјално неприфатливо и несоодветно. Терапевтот и експерт за родителство, Сагари Гонгала, издвојува три најчести лоши навики кои се поврзуваат со однесувањето на децата и споделува совети како родителите можат да ги поттикнат децата да престанат да ги прават.
Грицкање нокти
Многу возрасни и деца имаат навика да ги грицкаат ноктите од навика или кога се под стрес. Доколку оваа навика не се коригира на рана возраст, големи се шансите таа да стане доживотна лоша навика.
Како некои од можните методи за спречување на грицкање нокти кај децата, експертите за родителство истакнуваат неколку совети. Доколку децата ги гризат ноктите поради стрес или анксиозност, неопходно е да се открие причината за овие чувства и да се најде решение. Меѓутоа, ако не е во прашање стрес, најдобро е да им дадете нешто да држат во раце за да го сменат фокусот.
Родителите треба да им објаснат на постарите деца зошто не е добро да ги грицкаат ноктите и да ги охрабрат да престанат да го прават тоа. Кога грицкањето ќе престане да биде навика, пофалете ги и доколку е потребно наградете ги.
Чепкање во нос
Една од вообичаените навики на многу деца од различни возрасни групи е чепкањето на носот. Развојот на оваа навика најчесто се јавува поради одредени непријатности или здравствени проблеми, како што се проблеми со дишењето, или поради досада. Чепкањето на носот се смета за непристојно во многу ситуации, а освен тоа, оваа навика може да резултира со крварење од носот или внесување на бактерии и вируси.
Родителите можат да им објаснат на постарите деца дека чепкањето на носот не е пристојна навика и дека треба да користат марамчиња. Исто така, секогаш кога ќе ги видат како го чепкаат носот, треба да им кажат да одат да ги измијат рацете. Постои шанса да поради тоа што мора да ги мијат рацете, да им здодее чепкање на носот.
Кога станува збор за помали деца кои сè уште не можат да разберат зошто не треба да го чепкаат носот, терапевтот им препорачува на родителите често да ги сечат ноктите на своите деца за да не предизвикаат крварење од носот и инфекции.
Чкртање со заби
Чкртањето на забите, медицински познато како бруксизам, генерално се случува кога децата се во длабок сон или под стрес. Повеќето деца ја надминуваат навиката откако ќе ги загубат млечните заби, но некои продолжуваат да го прават тоа. Како да ги поттикнете децата да не ја практикуваат оваа навика?
На почетокот, потребно е да се открие причината пред да се обидете да ги поттикне децата да престанат со оваа навика. Ако чкртањето е поврзано со никнувањето на забите, тоа најверојатно ќе биде само привремено, но и чкратњето предизвикано од стрес може да се реши со откривање на причината.
Родителите треба да разговараат со своите деца за работите кои ги вознемируваат или им предизвикуваат стрес и да им помогнат да откријат како да го решат проблемот. Понатаму, ако децата чкртаат со забите пред спиење или додека спијат, се препорачува пред спиење да им се направи топла бања или да им се прочита книга за да се опуштат.
