Сигурно барем еднаш сте се нашле во ситуација вашето бебе одново и одново ги соблекува обувките, а вам, како и на многу мајки, ви се крева косата од тоа? Но, науката тврди дека вашата ноќна мора го задушува растот, развојот и слободата на децата, пренесува порталот „You are mom“.
Во таа смисла, една контроверзна студија која ги збуни родителите ширум светот ги разбива митовите за настинките, бонтонот и проблемите со телото. Истражувањето е спроведено на Универзитетот Комплутенс во Мадрид и силно заговара бебињата да се оставаат боси. Имено, иако многу родители сè уште веруваат дека одењето боси може да предизвика чести настинки и дека не е пристојно, доколку бебињата се чувствуваат удобно и среќно и можат правилно да се развиваат и истражуваат, зошто да не ги оставите да одат боси?
„Кога ќе им се облечат чевлички, тие се лишени од корисни перцептивни информации кои можат да играат важна улога во нивниот централен нервен систем“, велат научниците. Експертите од овој универзитет објавија студија наречена Превентивна подијатрија: Босоногите бебиња резултираат со попаметни деца, што предизвика дебата во јавноста.
Поточно, истражувачите ја критикуваат продажбата и рекламирањето на обувки за проодување на децата, како и прекумерните педијатриски препораки дека чевлите мора да бидат на нозете на децата, што е чин неопходен само за одржување на топлината на стапалата, велат експертите. Џентил Гарсија предупредува дека покривањето на стапалата на детето ја спречува перцепцијата на положбата и движењето на неговото тело во однос на просторот. Според овој експерт, моторните вештини на босоногите деца созреваат побрзо, заедно со визуелната и мануелната координација. Затоа, тој ја нагласува важноста да се остават бебињата боси и тврди дека стапалата претставуваат пат кој го информира бебето за надворешниот свет преку кој се запознава со различни површини и текстури.
Згора на тоа, во областа на неврологијата, се верува дека стапалата на бебето се почувствителни на допир отколку неговите раце до десеттиот месец од животот, па затоа во тие први месеци од животот, стапалата извршуваат битна функција; бебето експериментира и учи преку тактилен контакт. Според фазите на развој на интелигенцијата на Пијаже, во сензорно-моторната фаза манипулацијата, движењето и организацијата на сетилните информации се важни бидејќи тие ја обезбедуваат првата концептуализација на детето за себе, просторот, времето и каузалноста.
Возрасните често се чувствуваат нервозни кога гледаат босоноги бебиња, но на децата им е поудобно на овој начин и порадо ќе бидат голи и боси отколку облечени и да носат чевли. Оваа студија ја намалува загриженоста со тоа што покажува дека, освен што босоногите деца се посреќни, тоа придонесува и за подобар и побрз развој на координацијата и помага да се оствари подлабока поврзаност со околината.
