Децата вегетаријанци имаат речиси двојно поголема веројатност да имаат помала тежина од нивните врсници кои јадат месо, покажа едно истражување.
Истражувачи предводени од експертите од болницата „Св. Мајкл“ во Торонто следеле околу 9.000 деца, од кои 250 биле вегетаријанци од околу вториот до петтиот роденден.
Оние деца чии родители им нуделе претежно растителна исхрана имале и до 94 проценти поголема веројатност да имаат помала телесна тежина. Научниците сугерираат дека тоа би можело да биде затоа што растителната исхрана не содржи доволно хранливи материи за децата во развој.
Да се биде вегетаријанец никогаш не било попопуларно во САД, при што околу 10 проценти од луѓето пријавиле дека јадат само растителна храна, во споредба со 2 проценти пред неколку децении.
Потребна е добро испланирана исхрана за децата да ги добијат сите важни хранливи материи за раст и развој
Многу здравствени експерти велат дека е сосема можно да се добијат сите потребни хранливи материи со добро испланирана вегетаријанска исхрана, но некои европски земји предупредија дека младите не треба да бидат вегани (клучно е исклучувањето на јајцата и млекото од исхраната) поради ризикот од неухранетост.
Во оваа студија, објавена во списанието „Pediatrics“, истражувачите користеле податоци од канадски деца кои биле следени до 2019 година. Меѓу учесниците постоела родова рамнотежа, а речиси две третини биле од европско потекло.
Педијатарот и главен автор на студијата, д-р Џонатан Мегваер, рече: „Вегетаријанската исхрана е поврзана со поголеми шанси за премала телесна тежина за возраста на детето. Ова ја нагласува потребата за внимателно планирање на исхраната за деца со помала телесна тежина кога се планира да се спроведе вегетаријанска исхрана“.
Тој, исто така, посочи дека резултатите би можеле да се должат на поголем број азиски деца кои биле во тест групата кои јаделе вегетаријанска храна.
