Поголема е веројатноста шестмесечните бебиња на мајки вакцинирани против Ковид-19 во текот на бременоста да развијат антитела на коронавирус во нивната крв во споредба со бебињата на невакцинирани мајки кои биле заразени со вирусот за време на бременоста, покажа помала студија.
„Многу заинтересирани за овие податоци, од родители до педијатри, би сакале да знаат колку долго мајчините антитела остануваат во организмот кај доенчињата по вакцинацијата на бремена жена. Сега имаме делумен одговор на тоа“
Д-р Андреа Едлоу, Општа болница во Масачусетс, Бостон
Резултатите од истражувањето беа објавени од научниците во списанието JAMA во понеделникот.
Тие објаснија дека се работи за 28 шестмесечни бебиња на мајки вакцинирани со две дози mRNA вакцина во периодот од 20-та до 32-та недела од бременоста, кога преносот на мајчините антитела на плодот преку плацентата е највисок и 12 бебиња на иста возраст чии мајки биле заразени со коронавирус во истиот период.
Детектибилни нивоа на имуноглобулин G (IgG), најчестото антитело во крвта, биле откриени кај 57 проценти од новороденчињата на вакцинирани бремени жени и само 8 проценти кај доенчиња на невакцинирани трудници кои се заразиле со коронавирус за време на бременоста.
Не е јасно кое ниво на антитела е потребно за да се заштити поединецот од инфекција, а антителата не се единствениот одбранбен механизам на телото.
Сепак, „многу заинтересирани за овие податоци, од родители до педијатри, би сакале да знаат колку долго мајчините антитела остануваат во организмот кај доенчињата по вакцинацијата на бремена жена. Сега имаме делумен одговор на тоа“, рече д-р Андреа Едлоу од Општата болница во Масачусетс во Бостон.
„Се надеваме дека овие наоди ќе бидат дополнителен поттик за бремените жени да се вакцинираат“, рече д-р Едлоу, пренесува „Хина“.
