Координирана од Светската алијанса за безбедно и здраво доење (WABA) во соработка со Светската здравствена организација (СЗО) и УНИЦЕФ, Светската недела на доење се одбележува секоја година од 1992 година. Оваа глобална кампања се одбележува во првата недела од август (1-7 август) во повеќе од 170 земји низ целиот свет, со цел да се подигне знаењето и свеста за важноста и придобивките од доењето, како и да се поттикне акција за теми поврзани со доењето.
Секоја година, кампањата се фокусира на различни теми поврзани со доењето, а овогодишната тема, „Дајте приоритет на доењето: Создадете одржливи системи за поддршка“ е повик за градење трајни, правични рамки што ги поддржуваат мајките што дојат и ги зајакнуваат семејствата. Повеќе од само кампања, WBW е глобално движење, посветеност на давање на секое дете најздрав почеток во животот, а воедно инвестирање во одржлива иднина за нашите општества и планетата.
Доењето е природен, моќен почеток за секое дете и здрав избор за мајката, со долгорочни придобивки за целото општество. Мајчиното млеко е природна храна, еколошки безбедна, не доведува до загадување на животната средина и претставува долгорочно одржливо решение за планетата. Од друга страна, производството и потрошувачката на адаптирани млечни формули како замена за мајчиното млеко има негативно влијание врз животната средина, т.е. придонесува за осиромашување на природните ресурси, деградација на животната средина и емисии на стакленички гасови што предизвикуваат глобално затоплување и климатски промени.
Мајчиното млеко е оптимална исхрана – содржи идеален сооднос на хранливи материи, витамини, ензими и антитела
„Во 2023 година глобалната стапка на ексклузивно доење од 6 месеци била 48 %, близу до целта на Светското здравствено собрание 50 % до 2025 година. За да се обезбеди позитивен раст и да се достигне нова цел за 2030 година до 70 % ексклузивно доење на 6 месеци, учеството на секој актер што го сочинува топлиот синџир е клучно. Поддршката на доење за поздрава планета бара создавање одржлива средина каде што доењето е приоритет. Кога доењето е заштитено, промовирано и поддржано се создава одржлива средина која ќе ни помогне да ги ублажиме непосредните влијанија од климатските промени. Заштитата, промоцијата и поддршката на доење се директни чинители кои се справуваат со нееднаквостите кои стојат на патот на одржливиот развој“, се вели на веб-страницата на Институтот за јавно здравје на РСМ, кој е член на Алијансата за безбедно и здраво доење (WABA).
ЗНАЧЕЊЕ НА ДОЕЊЕТО
Доењето е многу повеќе од оброк за бебето – тоа е длабока врска што создава сигурност, љубов и здравје за мајката и детето, со позитивно влијание врз целото семејство и заедницата.
За бебето:
- Оптимална исхрана – мајчиното млеко содржи идеален сооднос на хранливи материи, витамини, ензими и антитела.
- Ја јакне имунолошката заштита – го намалува ризикот од инфекции, дијареја, респираторни заболувања, алергии.
- Емоционална сигурност – доењето создава чувство на блискост, топлина и поврзаност.
- Долгорочни придобивки – се поврзува со понизок ризик од дебелина, дијабет тип 2 и кардиоваскуларни заболувања.
Доењето е многу повеќе од оброк за бебето – тоа е длабока врска што создава сигурност, љубов и здравје за мајката и детето, со позитивно влијание врз целото семејство и заедницата.
За мајката:
- Побрзо опоравување по породување – доењето ја стимулира матката да се врати во нормална состојба и го намалува крвавењето.
- Помага во губење на тежина – троши дополнителни калории.
- Заштитен ефект – го намалува ризикот од рак на дојка и јајници, остеопороза и кардиоваскуларни болести.
- Го зајакнува поврзувањето со бебето – преку окситоцинот (хормонот на љубовта).
За семејството и општеството:
- Економски придобивки – бесплатно е и ја намалува потребата за купување адаптирани формули и медицинска нега поради болести.
- Одржливост – доењето нема потреба од пакување, производство и транспорт, што го прави еколошки најприфатливиот начин на исхрана.
- Јавно здравје – промовирањето на доењето може значително да ги намали здравствените трошоци на национално ниво.
