Под слоганот „Слатко или кисело?“ оваа година за првпат се одбележува Светската недела за подигање на свесноста за шеќерот, која се одвива во периодот од 8 до 14 ноември 2021 година.
Слатките пијалаци кријат кисела вистина. Засладените безалкохолни пијалаци се еден од најголемите придонесувачи за глобалниот внес на шеќер. Преголемата количина на шеќер во нашата исхрана е поврзан со зголемување на телесната тежина, дебелина, дијабетес тип 2, кардиоваскуларни болести и забен кариес. И покрај препораките за ограничување на внесот на засладени безалкохолни пијалоци, нивната продажба се зголемува ширум светот, особено во земјите со низок и среден приход како резултат на агресивните маркетинг кампањи.
Преголемата количина на шеќер во нашата исхрана е поврзан со зголемување на телесната тежина, дебелина, дијабетес тип 2, кардиоваскуларни болести и забен кариес
„За нашата прва Недела за подигање на свесноста за шеќерот, ќе се занимаваме со засладените безалкохолни пијалаци со цел да ја подигнеме свеста за штетните ефекти на овие пијалаци, како и да разговараме за различните политички активности кои се достапни за справување со високата и растечка потрошувачка. Време е владите ширум светот да кажат „доста е“ и да преземат акција за да го намалат шеќерот – пред нашето здравје да се „закисели“, апелираат од WASSH (World Action on Salt, Sugar & Health; Светска акција за сол, шеќер и здравје).
„Во последниве години, земјите реагираа со развивање мерки за намалување на шеќерот во исхраната, вклучително и маркетиншки ограничувања, даноци/такси за безалкохолни пијалаци засладени со шеќер, предупредувачки етикети на предниот дел од пакувањето и забрани за продажба на слатки безалкохолни пијалаци во училиштата. Од клучно значење е да се залагаме и промовираме политики за спречување на незаразни болести и намалување на потрошувачката на шеќер во нашиот регион“, се вели во соопштението на PAHO (Pan American Health Organization), која во соработка со WASSH (Светска акција за сол, шеќер и здравје) ја одбележува Светската недела за подигнување на свесноста за штетните ефекти на шеќерот 2021.
ИЈЗ се вклучува кон подигањето на свесноста од зголемениот внес на шеќери
Оваа година, Светската недела на свесност поврзана со шеќерот се фокусира на зголемениот внес на шеќери преку засладените безалкохолни пијалаци. Резултатите од истражувањето на Институтот за јавно здравје, во рамки на Иницијативата за следење на дебелината кај децата, покажаа дека внесот на засладени безалкохолни пијалаци повеќе од 3 пати неделно е застапен кај 45% од момчињата и кај 37% од девојчињата во Македонија. Внесот на ваквите пијалаци е една од главните движечки сили на зголемување на преваленцата на дебелина кај населението. ИЈЗ се вклучува кон повикот на Светската акција за сол, шеќер и здравје и повикува на акции од страна на носителите на одлуки кои ќе придонесат кон намалување на овие тенденции, а со тоа и намалување на здравствените ризици за населението, велат од ИЈЗ.
Време е владите ширум светот да кажат „доста е“ и да преземат акција за да го намалат шеќерот – пред нашето здравје да се „закисели“, апелираат од WASSH (World Action on Salt, Sugar & Health; Светска акција за сол, шеќер и здравје)
Да се намали консумацијата на грицки и засладени безалкохолни пијалоци кај децата во земјава, дел од заклучокот на истражувањето на ИЈЗ
„Прехранбените навики на децата може да ги расветлат основните причини за дебелината во Македонија. Има многу простор за подобрување во внесот на овошје и зеленчук. Треба да се намали консумацијата на грицки и особено засладени безалкохолни пијалоци. Националната програма за надзор на дебелината која собира податоци и презентира докази до креаторите на политиките е од клучно значење и треба да биде поддржана“, е дел од заклучокот на истражувањето на Институтот за јавно здравје, во рамки на Иницијативата за следење на дебелината кај децата, чии автори се Игор Спироски (Институт за јавно здравје – Скопје; Медицински факултет „Св. Кирил и Методиј“ во Скопје), Марина Николиќ (Европска агенција за безбедност на храната – Парма, Италија) и Шабан Мемети (Институт за јавно здравје – Скопје).
- Истражувањето под наслов „EATING HABITS OF CHILDREN IN NORTH MACEDONIA: RESULTS FROM THE FIFTH ROUND OF THE CHILDHOOD OBESITY SURVEILLANCE INITIATIVE (COSI)“ може да го прочитате ТУКА
Шест совети како да му помогнете на вашето дете да избегне засладени пијалaци
Американското здружение за срце препорачува ограничување на дневниот внес на додаден шеќер на помалку од 25 грама за децата од 2 до 18-годишна возраст. Тоа е околу 6 лажички! Обидете се со овие совети да ја намалите консумацијата на засладени пијалаци и да развиете поздрави навики:
- Започнете рано: Давајте само вода и млеко на деца под 1 година;
- Останете хидрирани: На децата и адолесцентите им требаат околу 6-8 чаши вода дневно;
- Додадете вкусови: Додадете овошје во водата или замрзнете го овошјето во калапи за мраз, па додајте го во водата;
- Прочитајте ја етикетата: Бидете свесни за содржината на шеќер во вашите омилени пијалаци;
- Ограничете го внесот на сокови, вклучително и 100% овошен сок;
- Прескокнете го спортскиот пијалак: Не им давајте спортски пијалаци на децата мислејќи дека се здрави.
