ПИШУВА:
Катерина Шекеровска-Димовска
katerina@pedijatar.mk
Светскиот ден на здравјето – 7. Април е одлична можност да им се заблагодариме на сите лекари, медицински сестри и останатиот здравствен персонал, кои несебично и пожртвувано, секојдневно се во првите борбени линии во битката против коронавирусот.
ВИ БЛАГОДАРИМЕ!
♦♦♦♦♦♦♦
Светската здравствена организација (СЗО) оваа година го посветува Денот на здравјето на работата на медицинските сестри и акушерки, како и потсетување до светските лидери за клучната улога што тие ја имаат во одржувањето на светот – здрав. Медицинските сестри и другите здравствени работници се во првите редови на битката против КОВИД-19 – обезбедувајќи висок квалитет, третман и грижа, адресирајќи ги стравовите и прашањата на пациентите, а во некои случаи, и собираат податоци за клинички студии. Сосема едноставно, без медицинските сестри, не би имало одговор.
Во оваа 2020 година, која е прогласена за меѓународна година на медицинските сестри и акушерки, Светскиот ден на здравјето го потенцира актуелниот статус на медицинска сестра низ целиот свет, под слоганот: Поддршка за медицинските сестри и акушерки.
Доц. д-р Венко Филипче: Здравствени работници, голем труд и многу работа вложувате, горд сум на вас и ви оддавам посебно признание!
„Подигнување на квалитетот, достапна здравствена заштита за сите, како и подобрување на условите за работа на здравствените работници е нашиот врвен приоритет. На Светскиот ден на здравјето упатувам посебно признание на целиот здравствен систем во однос на справувањето со коронавирусот во нашата земја. Здравствени работници, голем труд и многу работа вложувате, горд сум на вас и ви оддавам посебно признание! Во овие исклучително тешки моменти го давате својот максимум за спасување на животите на нашите пациенти. Но, не заборавајте да се грижите и за себе во овој период. Бидете внимателни и чувајте се! Како никогаш досега не сме си биле потребни и како никогаш досега не ни била потребна помошта од сите граѓани во нашата држава. Да ги почитуваме мерките и да се грижиме за здравјето на секој еден граѓанин!“, апелира Министерот за здравство, доц. д-р Венко Филипче.
Целите на кампањата за Светскиот ден на здравјето се:
- поттикнување во јавноста почитување на работата на медицинските сестри и акушерки и улогата што ја играат во давањето на здравствена и социјална заштита;
- зголемување на видливоста и важноста на медицинските сестри и акушерки во рамките на работната сила во здравството;
- катализирање на поддршката и инвестирање во медицински сестри и акушерки.
КЛУЧНИ ФАКТИ
⇒ На глобално ниво, 70% од здравствената и социјалната работна сила ја сочинуваат жени. Медицинските сестри и акушерките сочинуваат голем дел од тоа.
⇒ Медицинските сестри и акушерките играат клучна улога во грижата за луѓето насекаде, вклучително и во периоди на епидемија, во чувствителни средини и во војни.
⇒ Постигнувањето на здравје за сите ќе зависи од доволен број на добро обучени и едуцирани и адекватно поддржани медицински сестри и акушерки, кои примаат плата и признание пропорционално со услугите и квалитетот на грижата што ја пружаат.
Доц. д-р Горан Димитров, претседател на МЛД: Длабока почит, благодарност и восхит за натчовечките напори во справувањето со овој смртоносен вирус
Македонско лекарско друштво првпат во своето 75-годишно постоење нема да го организира традиционалното одбележување на Светскиот ден на здравјето
Во време на глобална пандемија поради Ковид-19 и вонредна состојба во целиот свет, Македонско лекарско друштво, како најстара лекарска асоцијација во државата, за прв пат во своето 75- годишно постоење нема да го организира традиционалното одбележување на Светскиот ден на здравјето – 7. Април. Но и во ваква состојба, Македонско лекарско друштво на пригоден начин им се заблагодарува на сите лекари, медицински и техничкиот персонал во здравствените установи, како и на Министерството за здравство, Министерството за внатрешни работи, припадниците на АРМ и сите останати формални и неформални чинители кои безрезервно се вклучени во борбата со Ковид-19.
„Светската Медицинска Асоцијација (WMA) секојдневно укажува за мерките и ги охрабрува своите членки – Лекарските асоцијации во светот да бараат од своите Влади да обезбедат највисоко ниво на заштита за здравствените работници, кои секојдневно се грижат за пациентите од кои повеќето тоа го работат во услови без минимален стандард за сопствена заштита – со што се соочуваат дури и најразвиените земји во светот“, истакнува доц. д-р Горан Димитров, претседател на МЛК. „Согледувајќи го вонсерискиот напор на лекарите и медицинскиот персонал, кои буквално се во првите борбени редови, МЛД Ви изразува длабока почит, благодарност и восхит за натчовечките напори во справувањето со овој смртоносен вирус“, додава д-р Димитров во своето обраќање по повод 7. Април.
⇒ Медицинските сестри и акушерките имаат однос со пациентите кој се темели на доверба, познавањето на целосната слика на нечие здравје што помага во подобрување на негата и заштедува средства. Тие исто така ги познаваат традицијата, културата и обичаите на својата заедница, што ги прави незаменливи за време на епидемии или други кризни ситуации.
⇒ Поголемо инвестирање во акушерките, кои се клучни за здравјето на мајките и доенчињата, како и за планирање на семејството, може да спречи над 80% од сите смртни случаи на мајки, мртвородени деца и смрт на новороденчиња. Кога бабиците или акушерките обезбедуваат нега од бременоста до крајот на постнаталниот период, може да се спречи скоро една четвртина од предвремено родените деца.
⇒ Многу земји треба да сторат повеќе за да им овозможат на медицинските сестри и акушерки да работат во безбедно опкружување во кое ги почитуваат нивните медицински колеги и членови на заедницата и каде нивната работа е интегрирана со работата на другите здравствени работници, посочува Светската здравствена организација на Денот на здравјето – 7. Април.
