Модерниот начин на живот носи и бројни предизвици, кои може да бидат особено тешки за тинејџерите. Светската здравствена организација поднесе детален извештај за проблемите со кои се соочуваат денешните тинејџери.
Според тој извештај, секој седми тинејџер на возраст од 10 до 19 години имал ментални проблеми во 2021 година, кои сочинуваат околу 13 отсто од сите болести. Оваа студија истакнува дека осаменоста, анксиозноста и депресијата се најчестите проблеми на тинејџерите, а чести се и дрогата, злоупотребата на алкохол, емоционалните и менталните нарушувања, кои една третина од тинејџерите ги доживеале пред 14-годишна возраст, а половина пред 18 години.
Други проблеми
Недостатокот на железо или анемија е уште еден проблем со кој се соочуваат многу деца. Според проценките на СЗО, меѓу 60 и 70 милиони девојчиња на возраст од 10 до 14 години страдаат од анемија, а таа бројка се зголемува на меѓу 80 и 90 милиони кај девојчињата на возраст од 15 до 19 години, објавува стручното списание Journal of adolescent health.
Уште еден проблем со кој се соочуваат голем број денешни тинејџери е обезноста. Според извештаите, во 2020 година, дури 10 отсто од тинејџерите момчиња и осум отсто од тинејџерките ширум светот биле со прекумерна телесна тежина. Овие бројки се очекува да се удвојат до 2035 година. Обезноста кај тинејџерите е поврзана и со времето кое го поминуваат играјќи компјутерски игри или вртење по социјалните мрежи.
На листата на проблеми со кои се соочуваат тинејџерите е и насилството, а секоја година милиони млади се жртви на различни форми на насилство. Исто така, осаменоста е уште една работа која ги мачи денешните тинејџери, а особено е изразена кај девојчињата. Од 2012 до 2018 година двојно се зголемил бројот на млади кои пријавиле осаменост, а тоа се поврзува и со активното користење на социјалните мрежи, иако сè уште не е докажана врската меѓу нив.
СЗО го наведува незнаењето за репродуктивното здравје како еден од главните проблеми кај адолесцентите, што може да доведе до сериозни последици по нивното здравје, вклучително и ширење на ХИВ и други сексуално преносливи инфекции.
