Ниту еден родител нема намера да воспитува разгалени деца. Но, доколку посетиме било кое игралиште, трговски центар или детска роденденска забава, можно е да бидеме сведоци на лошо однесување на разгалени деца кои ги малтретираат своите родители.
„Не толку одамна, ваквото однесување кај децата беше неприфатливо. Сега гласните јавни испади, лелекање, расправиите и малтретирањето на родителите се чини станаа норма“, вели терапевтот Шон Гровер за Psychology Today. Тој смета дека разгаленоста може да биде поттикната од технологијата.
„Пред да го впериме прстот кон родителите, да го признаеме влијанието на технологијата врз животите на децата. Интернетот и социјалните мрежи ги преплавија децата и фундаментално ги променија нивните рутини. Бројни студии покажаа дека преголемата зависност на децата од технологијата ја зголемува анксиозноста, депресијата и социјалната изолација. што резултира со слаба толеранција на фрустрација“, објаснува Гровер.
Три специфични типови на родители поттикнуваат разгаленост кај децата
Сепак, психологот додава дека одредени типови родители или родителски стилови можат да влијаат на воспитувањето разгалени деца.
Еве кои типови ги издвојува.
- Родители кои биле злоставувани или занемарени од нивните родители, па сакаат да го надоместат своето детство давајќи им премногу моќ на своите деца.
- Родители кои страдаат од анксиозност и не можат да ги видат своите деца како се борат, затоа премногу ги разгалуваат.
- Родители кои имаат проблем со донесувањето одлуки ја префрлаат родителската улога на своите деца, воспитувајќи ги да се грижат за нив, наместо обратно.
Како заклучок, Гровер истакнува пет главни последици од овие воспитни методи кои вклучуваат:
- Ниска толеранција на фрустрација
- Слаби вештини за решавање проблеми
- Лоша работна етика
- Предизвици во социјализацијата
- Емоционална незрелост.
