Топлинскиот осип (осип од жештина) е појава на мали, црвени точки на кожата, кои понекогаш можат да имаат дури и многу мали пликови. Се појавува на кожата кога бебето се прегрева и, иако може да се појави кај деца од различни возрасти, најчесто е кај бебињата бидејќи на нивното тело му е потешко да ја регулира температурата.
Овие точки најчесто се на наборите на кожата или на деловите каде што облеката е поприпиена за кожата – на пример, на стомакот, препоните, задникот, задниот дел од колената или на кожата на главата ако детето носи капа.
Осипот се смирува штом кожата малку се олади, а може да помогне и миење на кожата со млака вода.
Инаку, неодамнешните истражувања покажаа дека кога бебињата се прегреваат, ризикот од смрт се зголемува, поради што е важно внимателно да се следи бебето и да се потрудите да не му биде премногу жешко.
Што помага при осип од топлина
Ладење: Започнете со соблекување или олабавување на облеката на бебето и преместување на ладно, место под сенка. Користете влажни облоги на осипот за да го оладите и да го ублажите чешањето. Капењето на бебето во млака вода со околу две лажички сода бикарбона може да биде смирувачко.
Сушење на воздух: Не ја сушете кожата на бебето со крпа бидејќи тоа може да го иритира осипот, туку оставете го да се исуши на воздух или нежно тапкајте ја кожата. Избегнувајте употреба на креми кои би можеле да го продолжат времетраењето на осипот.
Одржувајте ја температурата во собата ноќе: Користете клима уред или вентилатор, но осигурајте се дека студениот воздух не е насочен директно кон бебето. Одржувајте ја температурата пријатна, не треба да биде ниту премногу ладна.
Кожата мора да дише: Изложувајте ја кожата на бебето на воздух колку што е можно повеќе – оставете ја да биде гола или облечете го детето во тенок слој широка, мека облека.
Превенцијата е секогаш подобра од лекувањето: Бебињата имаат особено чувствителна кожа и треба да ги чувате во сенка, скриени од директна сончева светлина секогаш кога е можно. Ако ползат и неизбежно ќе бидат на сонце некое време, користете крема за сончање со висок заштитен фактор, шапка за сонце и заштитете го што е можно поголемиот дел од нивната кожа со облека.
