Списокот на работи што се менуваат во бременоста како да нема крај. За некои промени се зборува отворено и тие имаат свои јасни, стручни термини. Потоа доаѓаат оние за кои не ви е баш најпријатно да зборувате со секого, но морате да ги споделите со лекар. А има и такви промени за кои инаку не би зборувала лесно, но во бременоста едноставно ви станува сèедно — па дури успевате и да се пошегувате за нив, а понекогаш и да им дадете и симпатично име. Една од нив е и – трудничкиот нос.
Каква врска имаат бременоста и носот, си помислувате? Или можеби прашувате ‘ради реда’, а всушност ви олеснува што конечно некој зборува за нешто што и самата сте го забележале, но безуспешно се обидувате да го сокриете. Да, трудничкиот нос навистина постои. И не е измислица. Жените решија да ги споделат своите „маки“ со интернет-публиката и притоа малку да се пошегуваат на своја сметка.
Така, социјалните мрежиа станаа место каде трудниците отворено зборуваат за оваа појава — за тоа како носот им се менува во текот на бременоста. „Труднички нос“ не е стручен термин, но факт е дека кај многу жени носот навистина се зголемува, особено кон крајот на бременоста.
Дали трудничкиот нос е вистинска појава?
Најпрво, важно е да се нагласи: секој нос, каков и да е, е твој и токму таков е најдобар за тебе — била бремена или не. Сепак, некои жени се збунуваат од оваа промена, а оние што повеќе внимаваат на беспрекорен изглед може дури и да почнат да чувствуваат страв од бременоста. Сосема непотребно. А што велат стручњаците?
Да, носот често се менува во бременоста, а „виновниците“ се очекувани — хормоните и зголемениот волумен на крвта. Како што низ телото циркулира поголема количина крв, таа стигнува до сите делови на телото. Иако нејзината основна задача е да ѝ обезбеди сè што ѝ е потребно на бебето, понекогаш таа се задржува во поголеми количини и на места каде не ја очекуваме — на пример, во носот. Тогаш тој може да изгледа отечен, односно поголем.
Кога треба да се загрижите?
Единствената потенцијално сериозна состојба на која може да укажува отечен нос е прееклампсијата, која вклучува општо отекување на телото. Во тој случај, и носот може да изгледа поголем. Ако тоа ве загрижува, споменете му на лекарот на преглед. Но, доколку редовно го контролирате крвниот притисок и ги следите препораките, најчесто нема причина за паника.
Исто како и со стапалата што можат да се зголемат во бременоста, некои жени велат дека носот никогаш целосно не им се вратил „на старо“. Сепак, кај повеќето, оваа промена е привремена. А најважното од сè — вашето бебе ќе го обожава вашето лице, без разлика на големината на носот.
