Центрите за контрола и превенција на болести (CDC) во САД официјално ги променија препораките за вакцинација на новороденчињата против хепатитис Б. Наместо вакцината автоматски да се препорачува за сите бебиња веднаш по раѓањето, ЦДЦ сега советува мајките кои се негативни на вирусот да разговараат со својот педијатар дали нивното бебе треба да ја прими првата доза во рок од 24 часа по раѓањето.
Оваа промена доаѓа откако новиот државен секретар за здравство, Роберт Ф. Кенеди Џуниор, оваа година именуваше нови членови на одборот за вакцини, со што беше променет претходниот состав. Препораката беше донесена на почетокот на месецот, а привремениот директор на ЦДЦ, Џим О’Нил, официјално ја прифати, што е последниот чекор за нејзино спроведување како официјална политика на агенцијата.
„Ја враќаме рамнотежата во информираната согласност на родителите чии новороденчиња имаат мал ризик од заразување со хепатитис Б“, изјави О’Нил, пренесува Ен-Би-Си Њуз.
Досега ЦДЦ ја препорачуваше првата доза од вакцината веднаш по раѓањето, што беше стандард уште од 1991 година. Одлуката за промена предизвика критики од бројни експерти за јавно здравје, лекари и политичари, кои го повикаа О’Нил да ја задржи претходната препорака.
Новата политика предлага првата доза од вакцината против хепатитис Б кај здрави бебиња да се одложи најмалку до вториот месец од животот. Сепак, бебињата чии мајки се позитивни на хепатитис Б или кај кои статусот на мајката не е познат, и понатаму треба да ја примат вакцината во првиот ден од животот.
ЦДЦ сè уште ја разгледува и дополнителната препорака на одборот: родителите да разговараат со педијатар за можноста од тестирање на децата за антитела пред да се одлучи за следните дози од вакцината. Стандардниот режим вклучува три дози.
Реакции од стручњаци и родители
Многу експерти предупредуваат дека одложувањето на вакцинацијата може да го зголеми ризикот од инфекции и од потенцијално сериозни последици, како заболувања на црниот дроб или рак. Откако ЦДЦ воведе универзална вакцинација веднаш по раѓањето, бројот на педијатриски случаи на акутен хепатитис Б се намали за 99 % помеѓу 1990 и 2019 година. Хепатитис Б може да се пренесе од мајка на дете за време на породувањето, а не сите бремени жени се тестираат. За оваа болест не постои лек.
„Укинувањето на препораката за новороденчињата го зголемува ризикот од повторен пораст на заболени и ја прави Америка поболна“, изјави сенаторот Бил Касиди, лекар специјализиран за заболувања на црниот дроб.
Педијатрите и понатаму ги советуваат родителите да ги вакцинираат своите новороденчиња против хепатитис Б, а Министерството за здравство и социјални услуги нагласува дека новите препораки нема да влијаат на осигурителното покритие за вакцината. Таа и понатаму ќе биде достапна бесплатно преку програмата Vaccines for Children за деца без осигурување или со недоволно осигурување.
Одлуката на ЦДЦ во врска со хепатитис Б е само најнов пример за промени во политиките на агенцијата кои, според критичарите, не се целосно засновани на научни докази. Откако Кенеди во јуни ги разреши долгогодишните членови на одборот за вакцини на ЦДЦ и ги замени со нов состав скептичен кон вакцините, агенцијата почна да издава препораки кои во одредени случаи се во спротивност со воспоставената медицинска пракса.
На пример, минатиот месец ЦДЦ ја промени интернет-страницата на која претходно јасно се тврдеше дека вакцините не предизвикуваат аутизам, наведувајќи наместо тоа дека поврзаноста не може целосно да се исклучи. Исто така, неодамна им препорача на бремените жени да размислат за избегнување на парацетамол (активната состојка на Тајленол) поради можна поврзаност со аутизмот, иако повеќето научни студии тоа не го потврдуваат.
И покрај овие промени, професионалните здруженија, како Американската академија за педијатрија, и понатаму препорачуваат првата доза од вакцината против хепатитис Б да се даде во рок од 24 часа по раѓањето, а потоа дополнителни дози на возраст од 1–2 месеци и 6–18 месеци.
