Прочитајте кога и како да ги отфрлите овие три најчести детски навики.
ЦУЦЛА
Одвикнте го детето од цуцла кога ќе наполни две години, нема потреба за порано одвикнување ако на детето му е потребна цуцла. Американското здружение на педијатри препорачува користење цуцла поради учење на бебето на самосмирување, а некои истражувања цуцлата ја поврзуваат и со намалување на ризикот од синдром на ненадејна смрт кај дете (СИДС). Психологот Робин Голдстеин додава дека се уште не е познато дали подолгото користење на цуцла влијае на проблеми со забите или на подоцен развој на говорот.
КАКО?
Среќно објавете му на детето дека цуцлата сега “живее“ во креветче и ако сака мора да биде во креветче со неа. Кога ќе почувствувате дека детето во целост е подготвено да се одвикне од цуцлата, раскажете му некоја интересна приказна, како дека некоја вила Цуцла дошла по својата цуцла и веќе ја нема. Само запомнете дека одвикнувањето не треба да го правите во период на големи промени кај детето, како одвикнување од пелени, оти во тоа време ќе му треба утеха.
ШИШЕНЦЕ
Одвикнете го детето од шишенце кога ќе го усоврши користењето на шолја со капак, помежу 12 и 18 месеци. Нема штета во користењето на ноќно шишенце до втората година од животот (се додека не му дозволувате на детето да заспие со шише со млеко или сок, оти тоа може да доведе до кариес). Но, дозволувањето на детето покрај себе да има шишенце за време на дневното хранење, може да биде контрапродуктивно. “Ако детето пие премногу млеко од шишенце, веројатно нема да биде премногу заинтересирано за друга храна што му е потребна“, велат експертите.
КАКО?
Почнете со избор на шолја што лесно ќе ја држи и нема да пропушта. Потоа претставете му ја како дел од приборот и оставете го детето извесно време да си игра со неа. Еднаш кога ќе се навикне да ја проба, постепено тргајте му го шишенцето. Имајте предвид дека е поедноставно да се одвикне дете од шише на возраст од 12 до 18 месеци, отколку на две години.
КОЛИЧКА
Одвикнете го детето од количка кога ќе се заморите од постојано туркање на детето во неа. Освен ако немате километри да изодите од градинка секој ден, нема потреба дете кое е способно да оди, да користи количка по третата година од животот.
КАКО?
Штом детето ќе биде способно да оди неколку улици само, поставете некои правила: количка користете само во долги прошетки или кога до доцна сте надвор и знаете дека детето е преуморно само да оди.
