Украсните растенија, убаво изгледаат и го оплеменуваат просторот во домот, но може да бидат многу опасни, па дури и погубни за најмладите. Според стручњаците, тие не треба да се чуваат во дом во кој престојуваат деца, бидејќи многу од нив се отровни.
На списокот вакви цвеќиња се: фикус, филадендрон, дифенбахија, драцена, олеандер, нарцис, хризантема, циклама, рододендрон и многу други.
Растенијата претставуваат вистинска мамка за децата кои сакаат да ги допираат, корнат, чепкаат, грицкаат и може да доведат до алергија, осип, болки во стомакот, повраќање, дијареа, па дури и сериозно да го загрозат здравјето, па и животот на детето.
“Ако детето допре растение – фикус, може да добие иритација на кожата и да почувствува пецкање и чешање. Но, ако проголта дел од лист на фукусот, ќе почувствува пецкање во грлото и тежнато дишење. Кај дифенбахијата и филадендронот, кои се чести растенија во домовите, треба да се знае дека отровна е цела билка и доколку стигне до устата на детето, ќе предизвика отекување на јазикот и пречки во говорот“, објаснуваат лекарите.
Тие напоменуваат дека ако детето проголта дел од корен на циклама, може да дојде до појава на силни мачнини, болки и повраќање. Олеандерот содржи токсини кои предизвикуваат промени во срцевиот ритам и во циркулацијата на крвта, да голтањето на само еден лист од него, може да биде смртоносно за детето.
