Бременоста е убав, но нималку едноставен период за жените, кои мораат да бидат многу внимателни во тие девет месеци, за да не го загрозат ниту своето, ниту здравјето на бебето. Самиот чин на породување може да биде сосема различен за идните мајки, па дури и сосема поинаков за една жена која раѓа неколку пати.
Некои, за жал, доживуваат и некои компликации поради кои породувањето нне им останува во добро сеќавање, а има и мајки кои со компликации се соочуваат по породувањето. Според некои податоци, околу една третина од жените имаат долгорочни здравствени проблеми по бременоста и породувањето, како што е објавено во стручното списание The Lancet Global Health.
Најчестите проблеми со кои се соочуваат родилките, а кои можат да траат со месеци или дури со години, вклучуваат:
- Диспареунија, односно болка за време на интимни односи (погодува дури 35 проценти од жените во постпартум)
- Болка во долниот дел на грбот (32 проценти)
- Анална инконтиненција (19 проценти)
- Уринарна инконтиненција (кај осум до 31 процент)
- Анксиозност (од девет до 24 проценти)
- Депресија (11-17 проценти)
- Болка во перинеалниот регион, односно околу анусот и ректумот (11 проценти)
- Тохофобијата, т.е. страв од породување (од шест до 15 проценти)
- Секундарна неплодност (11 проценти)
Меѓутоа, авторите на студијата нагласуваат дека многу жени кои ги имаат овие постпородилни компликации живеат во области каде што немаат пристап до постнатални здравствени услуги.
„Многу состојби кои се јавуваат во постпарталниот период значително влијаат на секојдневниот живот на жените по породувањето, во емоционална и физичка смисла“, вели директорот на Одделот за репродуктивно здравје при Светската здравствена организација. Тој додва дека на жените им е потребен пристап до низа услуги од медицинските работници, за да не само породувањето да помине без проблеми, туку и да уживаат во добро здравје и подобар квалитет на живот.
