Гадење и повраќање се првите појасни симптоми на бременоста. Околу 80 отсто од жените страдаат од мачнини во текот на бременоста, најчесто наутро, иако мачнината може да се појави во секое време од денот. Тие се појавуваат помеѓу шестата и осмата недела од бременоста и се намалуваат до 13-та недела. Д-р Керолин Лејн, лекар по семејна медицина, тврди дека малите мачнини се всушност добар знак. “Доколку бременоста се развива нормално, а сите хормони за бременост се присутни, речиси е сигурно дека ќе почувствувате гадење и нагон за повраќање во текот на бременоста. Ова е поврзано со подобри исходи од бременоста”, вели таа.
Таа предупредува дека трудниците со повраќање сепак треба да бидат внимателни. Прво, тие треба да се погрижат да не се дехидрираат и нивните електролити да не се во нерамнотежа бидејќи тоа може да биде штетно. Исто така, доколку повраќаат крв, а дополнително имаат болка или температура, или мачнините продолжуваат во текот на вториот триместар (по 13-та недела), д-р Лејн ги советува трудниците да се обратат кај својот гинеколог.
КОГА ДА СЕ ЗАГРИЖИТЕ?
Екстремните утрински мачнини се нарекуваат Hyperemesis gravidarum, односно хиперемеза во бременоста. Иако сè уште не е позната точната причина, експертите веруваат дека се работи за поинтензивни хормонални промени. Жените кои страдале од екстремни мачнини изјавиле дека се чувствуваат многу исцрпени. Лицата кои страдаат од оваа форма на утринска мачнина треба внимателно да се следат бидејќи тоа може да предизвика брзо губење на тежината, дехидрација и таложење на токсини во крвта или урината што може да предизвика кетоза. Поблагите случаи се третираат со промена на исхраната и одмор. Потешките случаи бараат хоспитализација за жената да прими инфузија. Ако повраќањето продолжи и покрај третманот, животот на мајката може да биде во опасност. Тогаш една од опциите што можете да ја разгледате во консултација со вашиот лекар е прекин на бременоста.
ШТО МОЖЕ ДА НАПРАВИТЕ?
Д-р Лејн предупредува дека не постои единствен рецепт што да се јаде, туку дека секоја трудница мора да го слуша своето тело. „Обидете се да направите мали промени во вашата исхрана и начин на живот. На пример, истражувањата покажауваат дека јадењето помали оброци повеќе пати во текот на денот и повеќе одморање може да помогне да се ублажат утринските мачнини“, вели д-р Лејн.
Еве неколку совети како да ги надминете утринските мачнини:
- Избегнувајте да бидете покрај пушачи бидејќи пушењето може само да го влоши гадењето.
- Јадете чести и помали оброци. Подобро е отколку да бидете премногу гладни, а потоа да се прејадете.
- Додатоците во исхраната кои содржат железо може да ви бидат тешки за желудникот, затоа разговарајте со вашиот гинеколог за тоа што можете да земате за време на бременоста.
- Пијте многу течности.
- Иако копнеете за зачинета и мрсна храна, избегнувајте ја по секоја цена.
- Избегнувајте храна која има интензивен мирис.
- Јадењето ладна храна или храна на собна температура може да помогне.
- Избегнувајте пијалоци кои содржат кофеин, како чај, кафе или газирани напивки.
