Научничката Марлена Феизо страдала од мачнини за време на нејзината втора бременост. Тие биле толку силни што таа не можела да јаде и се чувствувала слабо поради постојано повраќање. Лекарите и рекле дека тоа е само во нејзината глава, пишува Science Alert.
Речиси две третини од трудниците доживуваат различни степени на мачнини или повраќање во првиот триместар од бременоста, познато како утринска мачнина. Тешките форми на утринска мачнина вклучуваат ризици како што се губење на тежината и дехидрација, што може да ги загрози мајката и нероденото дете.
Феизо предводи тим на истражувачи кои сега, по повеќедецениско истражување, го изолираа хормонот кој делува на мозокот и предизвикува повраќање. Со други зборови, тие го сметаат за виновник за утринските мачнини.
Мачнината и повраќањето се многу чести во првиот триместар од бременоста, но кај околу 2 проценти од случаите, или 1 од 50 бремености, се развива најтешката форма позната како хиперемезис гравидарум (ХГ). Токму од оваа состојба страдала Феизо и тоа искуство ја поттикнало да продолжи да ја бара основната причина за проблемот.
На почетокот на 2022 година, таа и нејзините колеги откриле неколку генетски варијанти во генот GDF15 што ги поврзуваа со ризикот од ХГ и понудиле докази кои поддржуваат дека GDF15 предизвикува хиперемеза. Како и многу други протеини, нивото на GDF15 се зголемува за време на бременоста, а некои жени се чини дека се почувствителни на него од другите.
Феизо и нејзиниот тим од Медицинскиот факултет Кек на Универзитетот во Јужна Калифорнија откриле дека нивоата на GDF15 биле повисоки кај група од околу 60 жени со хиперемезис гравидарум отколку кај група бремени жени кои не биле толку погодени од утрински мачнини.
„Сега можеме со сигурност да заклучиме дека повисоките циркулирачки нивоа на GDF15 во мајчината крв се поврзани со зголемен ризик од ХГ“, објаснува проф. д-р Феизо.
Веста дека научниците можеби ја откриле причината за хиперемезис гравидарум треба да им донесе олеснување на бремените жени, иако сè уште не се развиени нови третмани за оваа состојба.
