(ОБНОВЕНО)
Демант од ЕМА: Сè уште не е донесен заклучок, анализите се во тек
Европската агенција за лекови (ЕМА) демантираше дека е веќе воспоставена каузална врска помеѓу вакцината на Оксфорд/АстраЗенека и редок синдром на згрутчување на крвта, откако Марко Кавалери, висок службеник од Агенцијата, изјави дека постои поврзаност.
Во изјава за агенцијата „Франс Прес“, Европската агенција за лекови (ЕМА) во вторникот рече дека „сè уште не е донесен заклучок и дека анализите се во тек“, додавајќи дека се очекува да ги објави своите наоди во среда или во четврток, пренесе „Гардијан“.
♦♦♦♦♦♦♦
Официјалниот претставник на Европската агенција за лекови (ЕМА) Марко Кавалери претходно го потврди постоењето на „врска“ помеѓу АстраЗенека и случаите на тромбоза по примањето на вакцината против коронавирус.
„Сега можеме да го кажеме тоа, јасно е дека постои поврзаност со вакцината. Што ја предизвикува оваа реакција, сепак, сè уште не знаеме… Да резимираме, во следните неколку часа ќе кажеме дека има врска, но сепак, мора да разбереме како доаѓа до тоа“, изјави Кавалери за италијанскиот весник „Месаџеро“ .
Тој објаснува дека се обидуваат да „добијат прецизна слика за тоа што се случува, за прецизно да го дефинираат синдромот како резултат на вакцината“.
„Меѓу вакцинираните лица има повеќе случаи на церебрална тромбоза кај младите отколку што би очекувале. Тоа ќе мора да го кажеме“, додаде тој.
Сомневања за можни, но ретки сериозни несакани ефекти се појавија во последните неколку недели, по случаите на атипична тромбоза кај лица вакцинирани со АстраЗенека.
ЕМА досега тврдеше дека „не е докажана никаква поврзаност со вакцината“ иако е „можна“, како и дека придобивките од вакцинацијата против коронавирус се поголеми од ризиците.
Повеќе земји поради тоа ја запреа вакцинацијата со АстраЗенека, а производителот на вакцини во март рече дека „нема докази за зголемен ризик“, пренесува „Бета“.
