Деновиве до нашата редакција пристигнаа повеќе прашања поврзани со вакцинацијата во услови на пандемија на коронавирус. Многу од родителите се во дилема дали да ги вакцинираат децата според редовниот календар за имунизација или да почекаат додека не стивне актуелната состојба со коронавирусот во земјава.
„Новороденчињата и предшколските деца може да се вакцинираат во редовен термин, а за школските деца вакцината може да се одложи два до три месеца. Тоа е стручно мислење на Комитетот за имунизација“, објасни Министерот за здравство Венко Филипче на една од своите прес-конференции.
Во врска со вакцинацијата, се огласи и ЈЗУ Здравствен дом Скопје со свое кратко соопштение кое ви го пренесуваме интегрално:
„Драги наши родители и најмали корисници на здравствени услуги, Ве информираме дека поради актуелната состојба со коронавирусот, вакциналните пунктови во сите наши поликлиники работат од 12 до 18 часот. Вакцинацијата се одвива непречено според календарот за имунизација. Ви благодариме на разбирањето и чувајте се!“, пишува во објавата на ЗД Скопје на нивниот официјален ФБ профил.
