Користејќи нов пристап за развој на вакцини, истражувачите можеби се на прагот на потенцијално решение за проблемот со бактериите отпорни на антибиотици.
Експериментална вакцина им обезбедила на глувците високo ниво на имунитет против смртоносните нивоа на Staphylococcus aureus (S. aureus), важен човечки патоген, објавија истражувачите во „Nature Communications“.
Прекумерната употреба на антибиотици доведе до еволуција на супербактерии отпорни на најчесто достапните третмани. Нови антибиотици или други решенија се повеќе од потребни, велат здравствените експерти.
За да развијат вакцина, истражувачите треба да идентификуваат молекула што телото ќе ја означи како туѓа. Овие молекули, или антигени, го поттикнуваат имунолошкиот систем да произведува антитела за борба против идната инфекција.
- Додека повеќето вакцини се потпираат на протеински антигени, новата вакцина користи јаглехидрат наречен полисахарид поли-бета-(1-6)-N-ацетилглукозамин или PNAG, кој е присутен на клеточниот ѕид на многу бактерии.
Научниците успеале да идентификуваат 32 PNAG јаглехидрати, од кои сите се состојат од пет шеќери, но со различни обрасци на одредени молекуларни компоненти кои се или врзани за друга мала молекула наречена ацетил група или не се врзани за ништо друго.
Тимот открил две верзии на PNAG кои биле особено ветувачки и ги поврзал со вирус кој ги инфицира бактериите. Заедно со вирусот, две комбинации на PNAG им обезбедиле на глувците „речиси целосна заштита“ од инфекции со S. aureus и MRSA, со минимално влијание врз здравите организми кои живеат во цревата, рекле истражувачите.
Широко распространетото присуство на PNAG во повеќе бактерии „го прави атрактивна цел за развој на вакцини“, додаваат тие.
