Вакцините на Фајзер и Модерна се 94% ефикасни против хоспитализација поради Ковид-19 кај целосно вакцинирани возрасни лица на возраст од 65 години и постари во САД, според новата студија на Американски центар за контрола и превенција на болести (CDC).
Студијата исто така открила дека вакцините биле 64% ефикасни кај оние постари возрасни лица кои биле делумно вакцинирани, што значи дека досега примиле само една доза вакцина.
Овие резултати се во согласност со резултатите од клиничките испитувања на вакцините, кои покажаа ефикасност од околу 94% до 95%, забележаа истражувачите од CDC и неколку други институции.
„Овие податоци сугерираат дека продолжувањето на брзото вакцинирање на возрасните во САД против Ковид-19 веројатно ќе има значително влијание врз хоспитализацијата и може да доведе до пропорционално намалување на пост-Ковид состојбите и смртните случаи“, пишуваат истражувачите во нивната студија.
Во студијата биле вклучени податоци за 417 возрасни лица на возраст од 65 години и постари со симптоми слични на Ковид-19, кои биле примени во 24 болници во 14 држави од 1 јануари до 26 март. Меѓу тие пациенти, 187 биле позитивни на коронавирусот што предизвикува Ковид-19, а 230 биле негативни.
Студијата исто така открила дека вакцините биле 64% ефикасни кај оние постари возрасни лица кои биле делумно вакцинирани, што значи дека досега примиле само една доза вакцина
Истражувачите откриле дека кај оние кои биле позитивни, повеќето биле невакцинирани. Само 18 од пациентите, или 10%, биле делумно вакцинирани со прва доза на Фајзер или Модерна и само едно лице, што претставува 0,5%, било целосно вакцинирано.
Меѓу 230 возрасни лица кои биле тестирани негативно, 44 од нив, или 19% биле делумно вакцинирани, а 18 или 8% биле целосно вакцинирани, покажале податоците.
Новата студија вклучува податоци од Калифорнија, Колорадо, Мериленд, Масачусетс, Мичиген, Минесота, Њујорк, Северна Каролина, Охајо, Орегон, Пенсилванија, Тенеси, Тексас и Јута. Потребни се повеќе истражувања за да се утврди дали слични наоди ќе се појават низ повеќе држави за да го претставуваат комплетното население на САД. (Си-Ен-Ен)
