Гостинка во новото издание на подкастот „Ваш педијатар“ е проф. д-р Татјана Јаќовска, специјалист педијатар, ЦФ пулмолог и претседател на Педијатриското респираторно здружение (ПЕДИАРЕС). Заедно со неа, ќе ги разгледаме сите аспекти една од најпредизвикувачките ретки болести – цистичната фиброза, вклучително и најновите терапии и третмани, како и предизвиците со кои се соочуваат пациентите во нивниот секојдневен живот, притоа истакнувајќи ја и важноста на заедницата и медицинските професионалци во оваа борба.
Цистичната фиброза не е само физички предизвик – таа е целоживотно патување испреплетено со многу емоции кое ги обединува семејствата и ги принудува да се соочат со тешкотии за кои можеби никогаш не биле подготвени
Оваа болест, која ги напаѓа белите дробови и дигестивниот систем, е многу повеќе од само медицинска состојба – таа е борба која секојдневно ги тестира границите на издржливост, упорност и посветеност на оние што живеат со неа, но и на сите оние што се нивна најблиска поддршка.
Цистичната фиброза не е само физички предизвик – таа е целоживотно патување испреплетено со многу емоции кое ги обединува семејствата и ги принудува да се соочат со тешкотии за кои можеби никогаш не биле подготвени. Секој здив за овие пациенти вреди повеќе од злато, секој ден е битка за подобар живот, а секоја победа, без оглед колку е мала, е причина за славење.
Болеста традиционално се смета за детска болест бидејќи првите симптоми обично се појавуваат во раното детство, а дијагнозата често се поставува пред или во текот на првите неколку години од животот. Меѓутоа, благодарение на напредокот во медицината и подобрените третмани, многу пациенти со цистична фиброза сега доживуваат возрасна доба, што ја прави болеста значајна не само за децата, туку и за возрасните.
Во подкастот ќе зборуваме и за важноста на генетското советување, клучен аспект за семејствата со историја на цистична фиброза, како и важноста на раната дијагноза и третман за подобрување на животниот стандард на пациентите.
Подкастот „Ваш педијатар“ со проф. д-р Татјана Јаќовска можете да го погледнете тука или на Јутјуб каналот на Pedijatar.mk.
