Сте направиле премногу адаптирано млеко или бебето не ја испило целата количина. Дали е безбедно да се остави подготвеното млеко за подоцна и колку долго? Различни медицински здруженија имаат различни мислења за ова, но сите се согласуваат дека е подобро млекото да се потроши млеко што е можно поскоро за да се спречи појава на штетни бактерии. Консултантот за лактација Рене Кам зборува за препораките.
- Развој на штетни бактерии
Некои експерти тврдат дека подготвената млечна формула не треба да стои повеќе од еден час на собна температура, додека Светската здравствена организација вели дека максималното време на чекање е 2 часа.
Штетните бактерии можат брзо да се развијат во подготвената формула, дури и ако се чува во фрижидер и тогаш можат да преживеат и да се размножуваат, само малку побавно. Колку подолго стои млекото, толку се поголеми шансите за развој на инфекција кај детето, па затоа е важно за секое хранење да се подготвува свежо млеко.
- Температурата на водата е важна
Млечната формула во прав не е стерилен производ, а причината поради која некои здравствени организации не се согласуваат околу тоа колку точно може да стои млекото се крие во температурата на водата со која се подготвува млекото.
Светската здравствена организација советува да се загрее водата на минимум 70 степени. Млекото, секако, му се дава на бебето кога е со оптимална температура за него.
Други организации кои препорачуваат млекото да се испие најдоцна еден час по правењето, го советуваат ова бидејќи сметаат дека за подготовка на млекото е доволна млака вода.
Доколку нема друга опција и формулата мора да се чува одредено време, сите се согласуваат дека тоа треба да биде во поладниот дел од фрижидерот и никако подолго од 24 часа.
