Често ви се чини дека вашето дете постојано е болно, особено во период од годината кој родителите го нарекуваат сезона на вируси. Носе кое тече, зголемена температура на неколку недели, на што понекогаш се надоврзува неподнослив стомачен вирус, и потоа кашлање кое трае во недоглед.
Вирусите се микроби кои предизвикуваат најчести болести кај децата од предучилишна и училишна возраст. Сите тие болести им се познати на родителите – настинка, бронхитис, инфекција на уво, грип, воспаление на грло… Постојат стотици различни вируси.
Настинката е многу честа појава и како што покажуваат статистиките, просечно, дете во предучилишна возраст настинува дури шест пати годишно. Ако ова ве изненадува, знајте дека здраво дете во периодот на растење кое опфаќа неколку години по раѓањето, има и до 12 вирусни инфекции годишно. Токму поради тоа што детето лесно може да заболи од друг вирус, а штотуку се опоравило од претходниот, може да ви се чини дека тоа е постојано болно.
Вирусите многу лесно се пренесуваат меѓу децата, особено во колективи – градинка, училиште, дневен престој, на детски слободни активности…
Највообичаени симптоми на вирусни инфекции се:
- Затнат нос и/или течење нос
- Црвени и солзни очи
- Воспалено грло
- Треска
- Кашлање и кивање
- Осип на кожата
- Повраќање и/или дијареа
- Замор и летаргичност
- Губење на апетитот
Кога се во прашање вирусните инфекции, најдобар третман е останување дома, мирување, што овозможува имуниот систем на детето да се избори со вирусот.
