Влакнетоста кај новородените бебиња често е причина за загриженост на родителите и сомнеж за постоење на ендокринилошки проблем. Меѓутоа, најчесто станува збор за лануго или т.н бебешки влакненеца, кои спонтано исчезнуваат во првите месеци од животот.
Според педијатрите, вообичаено е по раѓањето, новороденчето да има помал или поголем број на влакненца.
“Фините, меки, тенки влакненца кај новороденчињата не се никаква реткост. Тие се со светол пигмент, па често се и невидливи. Доколку можат да се видат, тоа значи дека нивната пигментација е посилна, но и тие, како и посветлите, спонтано ќе исчезнат“, потенцираат педијатрите.
Се наоѓаат по грбот, рамената, ушите и челото на бебето. Исчезнуваат во првите недели, а во некои случаи и по првите месеци од животот.
Тие, нагласуваат експертите, ретко се знак за некаков проблем, и доколку не се густи и јаки, нема потреба за загриженост. Сепак, доколку траат подолго од шест месеци или една година, потребно кај детето да се направи ендокринолошки преглед.
Овие влакненца настануваат за време на феталниот развој и претставуваат нормален дел од бременоста. Најчесто опаѓаат веќе помеѓу 33. и 36. недела од староста на фетусот. Нивната природна улога е да ја штитат кожата од оштетувања од плодовата вода и да имаат функција на заштита на плодот во матката.
