Се наближува терминот за породување, а со него и безброј прашања: Кога ќе започнат контракциите? Кога да одите во болница? Како ќе помине раѓањето? Во кое време ќе се роди бебето? Е, на последното прашање, можете да го дознаете одговорот врз основа на резултатите од истражувањето на научниците од Лондон.
За да ги добијат резултатите, научниците анализирале повеќе од пет милиони раѓања (со едно дете) што се случиле во Англија помеѓу 2005 и 2014 година.
Седум од десет породувања се случуваат надвор од редовното работно време
Според резултатите од нивното истражување, само 28,5 проценти од бремените жени се породуваат помеѓу 9 и 17 часот, односно за време на работното време.
Податоците собрани за време на ова истражување говорат дека мајките во Англија обично се породуваат во четири часот наутро. Седум од десет породување се изведуваат надвор од редовното работно време, што е неверојатни 71,5 проценти. Повеќе од 50% од природните раѓања се случуваат помеѓу еден и седум часот наутро, а како што рековме, најчесто околу четири часот наутро.
Трендовите на раѓање се сменија од 1950-тите. Стапките на интервенции односно царски рез и индуцирани породувања се во пораст. На пример, индуцираните раѓања завршуваат почесто ноќе, околу полноќ, додека планиран царски рез се закажува наутро помеѓу 9 и 11 часот, а тоа е и времето од денот кога се раѓаат најмногу „царски“ бебиња.
Мајките обично се породуваат во четири часот наутро
„Долгогодишното искуство и истражување од други области покажуваат дека природните раѓања најчесто се случуваат ноќе или во раните утрински часови. Тоа би можело да биде дел од нашето еволутивно наследство. Нашите предци живееле во групи кои биле активни и на различни страни во текот на денот, а се собирале и одморале ноќе, така што раѓањето ноќе веројатно и пружало заштита на мајката и новороденчето“, смета д-р Питер Мартин, автор на оваа студија.
Една работа останала мистерија за д-р Питер Мартин и неговиот тим. Имено, без оглед на начинот на раѓање, се чини дека повеќето бебиња не сакаат да се родат на Божиќ и ден потоа.
„Не бевме изненадени кога откривме дека планираните царски резови обично не се закажуваат за празници, но не ни е јасно што се случува со природно породување. Имаше помалку раѓања секоја година за време на истражувањето, на Божиќ и ден потоа, отколку во сите други денови во текот на годината, но овој феномен треба дополнително да се испита“, истакнува д-р Мартин (The Bump)
