Сакаме нашите деца да јадат многу овошје затоа што во главата ни одѕвонува едноставна мисла – здраво е! Освен што освежува и е полно со витамини, среќни сме што во едната рака не држат чоколадо, а во другата гумени бомбони. Но, дали знаевте дека претераното количество на одредени видови овошје може да предизвика проблеми – особено во топлите летни месеци?
Причината се крие во високата содржина на шеќери, можноста за дигестивни тегоби или потенцијални алергиски реакции. Еве со кое овошје треба да се биде особено умерен:
Лубеница
Иако лубеницата е омилена летна закуска – полна со вода и одлична за хидратација – со неа треба внимателно. Во големи количини може да предизвика надуеност, пролив или болки во стомакот, особено кај помали деца. Освен тоа, содржи природни шеќери кои во поголеми дози можат да го оптоварат дигестивниот систем.
Грозје
Грозјето е слатко и привлечно, но тешко за варење. Поради тенката лушпа и ситните семки, децата – особено помалите – може да имаат проблем со варењето или дури и со давење. Исто така, содржи многу фруктоза, што може да предизвика скокови на шеќерот во крвта.
Банани
Бананите се хранливи и практични за ужинка, но во лето можат да бидат „тешки“ за желудникот, особено ако се јадат во големи количини. Тие содржат многу скроб, што може да доведе до запек ако детето не внесува доволно течности.
Суво овошје (урми, смокви, кајсии…)
Сувото овошје делува безопасно, но претставува концентриран извор на шеќери и калории. Поради лепливата текстура и високиот процент на природни шеќери, може да предизвика и проблеми со забите.
Зошто е важна умереноста?
Иако овошјето е извор на витамини, минерали и растителни влакна, претераната консумација може да предизвика дигестивни проблеми, кожни реакции, па дури и зголемување на телесната тежина. Детскиот дигестивен систем е чувствителен, а летото дополнително ја зголемува опасноста од дехидрација. Затоа, овошјето не треба да биде замена за урамнотежени оброци и редовен внес на вода.
