17 Ноември е Светски ден на предвремено родените деца, ден кога целиот свет ги слави малите херои, а сите активности се посветени на подигнување на свеста за предвременото раѓање и предизвиците што ги носи за новороденчињата, нивните семејства, но и за здравствените системи.
Едно од 10 деца во светот се раѓа предвремено. Одбележувањето на 17 Ноември има за цел да ги истакне важноста на поддршката за предвремено родените деца, напредокот во медицината за грижа и третман, како и потребата за понатамошни инвестиции во здравствениот систем.
Општо земено, колку порано е родено бебето, толку поголема е потребата од интензивна нега, а со тоа и поголема е веројатноста за неповолни здравствени последици и трајни инвалидности
Денот беше инициран во 2008 година од EFCNI (The European Foundation for the Care of Newborn Infants) и партнерските европски организации на родители на нивната прва средба, а првпат се одбележа во 2009 година. 17 ноември е денот кога еден од основачите на EFCNI добил ќерка, откако претходно изгубил тројка поради предвремено раѓање – ден кој симболизира надеж и нов почеток. Во 2010 година, американската организација „March of Dimes“, африканската „LittleBigSouls“, австралиската „National Premmie Foundation“ и EFCNI ги здружија силите за да го направат овој ден посебен и глобално.
Глобално, околу 13,4 милиони бебиња секоја година се раѓаат предвреме.
Во земји со ограничени ресурси, стапките на преживување на предвремено родените бебиња се пониски отколку во земјите со поголеми ресурси. До денес, здравствените исходи од предвременото раѓање зависат од тоа каде е родено бебето
Според широко прифатената дефиниција на СЗО, секое бебе родено пред завршувањето на 37. недела од бременоста се смета за предвремено родено.
Предвременото раѓање дополнително се категоризира на следниов начин:
- доцно предвремено раѓање: бебиња родени помеѓу 32. и 37. недела од бременоста,
- многу предвремено раѓање: бебиња родени помеѓу 28. и 32. недела од бременоста,
- екстремно предвремено раѓање: бебиња родени пред 28. недела од бременоста.
Годинешната тема на Светскиот ден на предвремено родените деца „Повеќе од 13 милиони бебиња родени прерано секоја година. Пристап до квалитетна грижа за сите!“ го привлекува вниманието кон глобалниот обем на предвремени раѓања и критичната потреба за универзален пристап до висококвалитетна здравствена заштита. Предвремено родените бебиња, без разлика на тоа каде, кога или како се родени, заслужуваат ист стандард на грижа за да им се обезбеди преживување и долгорочно здравје.
Овој слоган е исто така повик за акција за подобрување на здравствената грижа за мајките, потенцирајќи дека и мајките и бебињата треба да добијат навремена и соодветна поддршка и медицинска помош. Обезбедувањето еднаков пристап до здравствена заштита е клучно за намалување на смртноста и инвалидитетот што можат да се спречат и за давање праведен почеток во животот на секое бебе.
Последиците од предвременото раѓање можат да бидат многу сериозни и трајни, а предвременото раѓање е водечка причина за смртност кај децата под петгодишна возраст
Многумина веруваат дека предвремено родените бебиња се само помали од бебињата родени во полн термин и дека им е потребно само дополнително време во инкубатор за да пораснат. За жал, предвременото раѓање е многу повеќе од тоа.
Предвремено родените бебиња често се соочуваат со сложени здравствени предизвици кои бараат специјализирана грижа, вклучително и проблеми со дишењето, незрела нервна и дигестивна функција, како и поголем ризик од инфекции. Секое предвремено родено бебе има уникатни потреби кои зависат од неговата гестациска возраст, тежина и здравствена состојба, а за многу од нив е неопходна долгорочна медицинска поддршка и следење за да се обезбеди здрав развој.
Општо земено, колку порано е родено бебето, толку поголема е потребата од интензивна нега, а со тоа и поголема е веројатноста за неповолни здравствени последици и трајни инвалидности.
Во земји со ограничени ресурси, стапките на преживување на предвремено родените бебиња се пониски отколку во земјите со поголеми ресурси. До денес, здравствените исходи од предвременото раѓање зависат од тоа каде е родено бебето. Последиците од предвременото раѓање можат да бидат многу сериозни и трајни, а предвременото раѓање е водечка причина за смртност кај децата под петгодишна возраст. 75 % од овие смртни случаи би можеле да се спречат доколку се користат постојните интервенции.
Виолетовата боја, симбол за Светскиот ден на предвремено родените деца, симболизира чувствителност и исклучителност. Секоја година, поединци и институции ширум светот го покажуваат своето почитување со виолетово осветлување – ова вклучува осветлување на згради, споменици, пејзажи и настани со виолетова боја како главна боја.
Друг симбол на Светскиот ден на предвремено родените деца се „чорапчињата“: еден мал пар виолетови чорапчиња висат заедно со девет пара чорапчиња со нормална големина, симболизирајќи дека ширум светот, едно од десет деца се раѓа предвремено.
