Вакцината против COVID-19 за деца е нешто што ги интересира сите родители. Дали е безбедна и дали децата треба да ја примат вакцината, се прашања на кои родителите сакаат да го знаат одговорот
♦♦♦♦♦♦♦
Токму на оваа тема за Си-Ен-Ен зборуваше и д-р Ентони Фаучи, главен американски епидемиолог и директор на Националниот институт за алергии и заразни болести.
„Кога ќе добиете нова вакцина, обично сакате да ја покажете нејзината безбедност и ефикасност кај возрасната популација“, објасни Фаучи.
„Откако ќе го направите тоа, тогаш почнувате да вршите испитувања, можеби неколку месеци подоцна, врз децата, со цел да им обезбедите вакцина што е можно побрзо“, рече тој.
„Гледаме тие испитувања да ги започнеме во јануари. Ќе почнеме со деца кои се малку постари, па полека ќе ја спуштаме старосната граница, така што се надевам дека за неколку месеци ќе можеме да го кажеме она што го знаеме, тогаш ќе можеме да кажеме дека вакцината е безбедна и ефикасна за децата“, додаде д-р Фаучи.
Запрашан дали вакцината против COVID-19 ќе направи вирусот потполно да исчезне, д-р Фаучи рече дека тоа е крајната цел – „целосно да се искорени COVID-19“.
„Еднаш штом ќе ги убедите повеќето луѓе да се вакцинираат, нивото на вирусот ќе опаѓа сè повеќе и повеќе, а потоа ќе се покаже дека повеќе немаме проблем. Значи, ќе можете да ги правите сите работи што сте ги правеле порано, да се вратите на вообичаениот начин на живот, да ги прегрнете или бакнете членовите на семејството и пријателите“, рече д-р Фаучи.
„Но, единствениот начин да дојдеме до тоа е широко прифаќање на вакцината“, додаде тој. (Си-Ен-Ен)
