Ритуалот на подготовка и пиење на чај се практикува илјадници години. Чајот содржи полифеноли кои го штитат срцето, антиоксиданти кои може да го намалат ризикот од карцином, како и други нутриенти кои го поддржуваат имуниот систем. Кога се зборува за периодот на бременост, благодатите од пиењето чај се уште подобри. Топла шолја чај може да ги намали утринските мачнини. Но, некои чаеви се потенцијално опасни во бременоста и потребно е да се избегнуваат.
КОРИСНИ БИЛКИ
Билните чаеви може да помогнат да се хидрира организмот, особено ако жената не пие доволно вода, а некои од нив дури и обезбедуваат и важни нутриенти, како калциум, магнезиум и железо. Еден од таквите чаеви е ројбос чајот. Чајот од ѓумбир или нане помага да се ублажат утринските мачнини, додека чајот од камилица може да помогне при несоница.
ЧАЕВИ КОИ ТРЕБА ДА СЕ ИЗБЕГНУВААТ
Некои билни чаеви не се безбедни за консумирање во текот на бременоста. Тоа главно се чаеви кои се користат како помош при слабеење, за чистење на организмот и имаат природно лаксативно дејство, оти може да предизвикаат промени во рамнотежата на електролитите.
КОФЕИН ВО ЧАЈОТ
Чаевите, како црн или зелен чај, содржат околу 40 до 50 мг кофеин во една шолја. Иако моментално не постојат доволно докази за влијанието на кофеинот на исходот на бременоста, стручњаците се согласуваат дека неговиот дневен внес мора да биде помал од 200мг што одговара на количина од 4-5 шолји чај.
