Кога се децата во прашање, особено во овој период на нетипично топло време, тогаш како родители стануваме особено внимателни и се трудиме да детето го скриеме од сонце, да не го изнесуваме надвор во време на најсилно зрачење, користиме заштитен фактор, очила, капчиња. Сепак, покрај сонцето, и топлината може да има негативно влијание на кожата.
Кај децата може да се случи топлото време да им предизвика осип на кожата, во форма на ситни црвени точки или милиарија.
КАКО СЕ МАНИФЕСТИРА ОСИПОТ?
На кожата се појавуваат ситни црвени точкички и на допир, кожата може да биде бодликава. Некогаш може да се случи да бидат и како бистри меурчиња кои се исполнети со течност. Обично промените се јавуваат на кожата на вратот и главата, како и во пределот на градниот кош.
Ваквиот осип се појавува поради запушување на потните жлезди при прекумерно потење при што потните жлезди се затвараат и не е можно да се извршува дишење на кожата (перспирација), кое резултира со црвени испакнатини или пликови. Оваа појава најчесто се случува во лето, кога времето е топло и влажно.
ПОСТОИ ЛИ ПРИЧИНА ЗА ЗАГРИЖЕНОСТ?
Нема голема причина за загриженост. Овој осип едноставно е начин на кој кожата реагира на насобираната пот.
ШТО ТРЕБА ДА ПРАВИТЕ?
Пред се, не грижете се. Осипот со тек на време ќе помине сам. Најдобро е веднаш да го елиминирате она што ја предизвикало самата реакција и промена на кожата. Ако детето има премногу облека на себе, ослободете го од вишокот слоеви, за да може да диши. Разладете го детето и тргнете го од топлина.
Совет е да не мачкате креми, оти тие може да ја влошат состојбата.
КАКО ДА СПРЕЧИТЕ ПОЈАВА НА ВАКОВ ОСИП?
- Кога сте надвор со деца, трудете се што повеќе да бидете во ладовина. Исто така, на високите температури не го наоблекувајте детето. Ако вам ви е многу жешко, сигурно му е ина детето.
- Ако детето е склоно да се поти, земете резервна облека, па по некое време преоблечете го.
- Избегнувајте и влажни простории, оти може да доведат до потење и појава на осип.
