Враќањето на училиште по долгиот летен распуст често носи стрес и замор, но и можност за нови почетоци. Децата се соочуваат со промена во рутината, а родителите со дополнителни обврски. Како да се олесни овој премин и да се направи помалку напорен, објаснува за Psychology Today Алиса Бојс, која практичните принципи на когнитивно-бихејвиоралната терапија и социјалната психологија ги претвора во совети за секојдневниот живот.
Сонот како темел на отпорноста
Добриот сон е клучен за емоционалната стабилност и отпорност. Кога сме ненаспани, потешко се справуваме со предизвиците. Затоа е важно да се обезбеди доволно сон и за децата и за родителите. Во првите недели од школската година, воведете правило за порана подготовка за спиење. Организирајте ја вечерната рутина – од вечерата до легнувањето – за да се избегне трчање и непотребен стрес.
Мали ритуали што ја разубавуваат рутината
Завршувањето на летото многумина го доживуваат како загуба, а тешко им паѓа помислата дека следниот одмор е далеку. За да биде учебната недела попријатна, воведете мали ритуали што носат радост. Тоа може да биде заедничко читање, кратка медитација, масажа со лосион, подготвување омилен ужинка или посебна „релакс среда“. Таквите ситници на децата им даваат чувство на сигурност, а на целото семејство – топлина.
Помалку брзање, помалку стрес
Постојаното повторување на „Побрзај!“ создава напнатост и кај децата и кај родителите. Ако често се наоѓате во таква ситуација, вреди да се размисли за подобра организација на утринските и дневните рутини. Кога обврските се добро распоредени, нема потреба од брзање, а дури и наједноставните активности може да станат пријатни.
Разбирање на детските емоции
Новата учебна година носи промени – нови наставници, училишни простории, па дури и отсуство на блиски пријатели. Секоја промена може да биде стресна, а некои деца потешко се прилагодуваат. Важно е нивните чувства да се прифатат, наместо да се потценуваат. Тоа што детето сега се бори со промената, не значи дека и како возрасен ќе се соочува со истото. Поддршката и безбедноста од родителите се клучни.
И родителите имаат потреба од грижа
Родителите го поставуваат тонот на целото враќање во училишна рутина. Ако вие сте смирени и организирани, и на децата ќе им биде полесно. Авторката Гретчен Рубин вели: „Септември е втор јануари“ – совршено време за нови почетоци. Размислете за сопствени мали ритуали: нова постелнина, однапред подготвени оброци или едноставно активности што ве релаксираат. Вашата емоционална стабилност директно се пренесува и на детето.
