Трпението се учи, а ние сме најдобар пример за нашите деца, вели популарниот Душко Илијевиќ, Валдорфски воспитувач со дваесетгодишна директна педагошка пракса.
„Децата сакаат се и тоа веднаш, нема тука многу трпение, тоа треба да се научи. Зимата е совршено време за тоа и совршена можност да научат дека работите не доаѓаат сервирани на чинија. Некои работи мора да ги почекаш, да дојде твоето време и зимата е одлично време кога децата можат да научат од нас. Ништо нема да научат ако правиме се за нив, затоа пуштете ги сами да се облекуваат за надвор. Сами нека си стават шал, полека нека ја облечат капата, да се подготват, а сето тоа бара време“, објаснува Илијевиќ и додава:
„Не ги забрзувајте, бидете пример, бидете трпеливи бидејќи вашето трпение ги учи како да бидат внимателни кон себе и кон другите. Ако брзате и постојано ги туркате напред, како ќе научат да чекаат? Чекањето не е лошо, тоа е подготовка. И природата чека, да дојде снегот, па да се стопи, да излезат нови цвеќиња и кога децата ќе видат колку е трпелива природата, кога ќе видат колку се трпеливи мама и тато, можеби ќе научат да се справуваат со фрустрацијата кога и тие мора да чекаат. Така стануваме посилни“.
