Помеѓу предтинејџерите кои поминуваат премногу време пред екраните на паметните телефони или компјутери, воочени се поголеми шанси за развој на опсесивно-компулсивно растројство или пореметување (ОКР), покажало истражување.
Шансите да на оваа возраст се развие ОКР во период од две години се зголемиле за 13 проценти за секој час играње видео игри и за 11 проценти за секој час гледање видеа, укажуваат резултатите од новата студија што ја спровеле истражувачите од Универзитетот УЦ Сан Франциско, а е објавена во стручното списание Journal of Adolescent Health.
Главниот автор на студијата ги предупредува родителите дека предолгото време поминато пред екраните може многу штетно да влијае на менталниот развој на децата во претинејџерската возраст.
“Децата кои поминуваат премногу време играјќи видео игри велат дека со текот на времето чувствуваат потреба да продолжат да играат такви игри и велат дека не можат да престанат и покрај нивните настојувања. Наметливите, несакани мисли за содржината на видео игрите може да се развијат во опсесии или компулзии кај некои деца, а постојаното гледање видео содржини ги поттикнуваат предтинејџерите на компулсивно следење на слична содржина. Таквото однесување обично се влошува со алгоритми и реклами“, вели д-р Џејсон Нагата, педијатар и доцент на Универзитетот.
Опсесивни мисли
Опсесивно компулсивното растројство спаѓа во групата на анксиозни нарушувања, а се карактеризира со појава на опсесивни мисли и компулсивни дејства. Лицата кои страдаат од ова нарушување ја сфаќаат ирационалноста на нивните постапки и ги доживуваат како непријатни, но не успеваат да ги спречат. Поради ова, може да страдаат сите аспекти од животот (работа, училиште, меѓучовечки односи), а многу активности може да станат ограничени.
Како дел од студијата, американските истражувачи прашале 9.204 предтинејџери на возраст од девет до 10 години колку време поминуваат на различни платформи.
Просекот изнесувал 3,9 часа дневно, без употреба на екрани за образовни цели. Две години подоцна, на 4,4 проценти од децата им бил дијагностициран новопојавен ОКР. Се покажало дека видео игрите и стриминг видеата се поврзани со поголем ризик од развој на ОКР.
Испраќањето СМС-пораки, видео разговорите и социјалните мрежи не биле поединечно поврзани со ОКР, но тоа може да биде затоа што децата вклучени во студијата не ги користеле често, велат истражувачите, додавајќи дека резултатите може да се разликуваат за постарите тинејџери.
Истражувањето е објавено во време кога се објавени резултати од одделна студија со кои се предупредуваат родителите дека на многу малите деца долгорочно може да им нанесат повеќе штета отколку корист ако често им даваат паметни телефони за да ги смират. Резултатите се објавени во списанието JAMA Pediatrics, а студијата опфатила 422 родители и 422 деца на возраст меѓу три и пет години во периодот од август 2018 до јануари 2020 година.
