Однесувањето на децата е променливо во зависност од околностите и нивното расположение. Сосема е очекувано да децата понекогаш се непослушни, да ги тестираат границите што ги поставуваат мама и тато, но некои работи во однесувањето навистина не треба да се занемарат.
Еве кои ситуации во однесувањето на децата бараат посебно внимание, а понекогаш дури и помош од стручно лице.
1. Чести промени во расположението
Разбирливо е дека сите сме понекогаш нерасположени, лути, нервозни, тажни, но внимавајте ако детето многу често го менува расположението. Честите промени во расположението може да бидат последица на проблеми на училиште или проблеми со врсниците, на пример.
2. Премногу спиење или постојано будење
Повторно, и спиењето кај децата може да биде променливо – на пример, не е претерано изненадувачки да детето спие полошо неколку дена ако е загрижено, да речеме, за некој тест на училиште. Меѓутоа, ако често спие предолго или постојано се буди, причините можат да бидат различни и најдобро е да се консултирате со лекар.
3. Проблеми со концентрацијата
Доколку забележите дека вашето дете има проблем со концентрацијата, експертите советуваат да се обидете да го промените пристапот и мотивацијата. Доколку постои и промена на апетитот, размислете дали детето можеби е изложено на преголем стрес.
4. Лоши навики
Ако забележите дека детето развива некои лоши навики како што се грицкање усна, грицкање нокти, вртење на косата во рацете… немојте тоа да го игнорирате, колку и да ви изгледа безопасно. Ова однесување често е резултат на стрес или нервоза, па затоа најдобро е да разговарате со експерт кој ќе ви даде дополнителни совети.
