За штетноста на сонцето многу се зборува и секако треба мудро да се избере времето за престој на сонце за да се заштитиме од низа потенцијални опасности што ја носи прекумерната изложеност. Сепак, сончевата светлина е нужна за живот. Помага во развојот на коските на новородените бебиња, а остантите бенефити за децата и возрасните се големи. Истражувањата покажале дека децата кои премногу време поминуваат на затворено имаат поголеми шанси за развој на хронични болести.
Природен извор на витамин Д
Околу 90% од витаминот Д телото го добива од сончевата светлина. Витаминот Д игра важна улога во метаболизирањето на калциум, цинк, магнезиум и други минерали во телото. Влијае на создавањето на бета ендорфин и серотонин, кои се одговорни за доброто расположение. Тој е исклучително важен елемент во градењето на имунитетот и помага во намалување на воспаленијата. Витаминот Д е од суштинско значење за телото во развој на детето.
Го намалува ризикот од кратковидност
Кратковидноста е се почеста меѓу децата и адолесцентите, а со текот на времето може да прерасне во посериозна болест на очите. Неодамнешни истражувања покажале дека доволно време поминато на дневна светлина го намалува ризикот од кратковидност. На децата им се препорачува минимум еден до два часа дневно на отворено.
Го намалува ризикот од мултипла склероза
Изложеноста на сончева светлина во детството го намалува ризикот од развој на мултипла склероза во возрасниот период, тврдат неколку студии. Во овој случај, дури и нивото на витамин Д не е клучен, туку општата изложеност на сонце.
Создава серотонин
Сонцето помага во создавањето серотонин, невротрансмитер кој го регулира нашето расположение и емоции. Експертите веруваат дека серотонинот исто така игра голема улога во развојот на мозокот бидејќи децата имаат повисоки нивоа на серотонин од возрасните. Зголеменото ниво на серотонин е поврзано со чувството на среќа, додека недостатокот предизвикува анксиозност, агресија, депресија и некои развојни нарушувања.
Го поттикнува движењето
Децата кои поминуваат доволно време на отворено , повеќе се движат, играат и трчаат повеќе од децата кои поголемиот дел од времето го поминуваат во затворени простории. Дури и да не се многу активни, децата на отворено се изложени на околината и разни природни дразби кои им се многу поважни и подобри од екраните. Играњето во песок или на земја е одлично за сензориката, но и за развој на имунитетот. Експертите се согласуваат дека дури и изложувањето на разни звуци од природата има смирувачки ефект.
